Сёння Мінск стаў пляцоўкай для вялікіх эканамічных перамоў - Еўразійскага міжурадавага савета. У Палацы Рэспублікі сабраліся прэм'ер-міністры пяці дзяржаў - Беларусі, Расіі, Арменіі, Казахстана і Кыргызстана. Афіцыйныя сустрэча, пасяджэнні ў вузкім і пашыраным фарматах, цырымонія фатаграфавання - традыцыйныя моманты на такіх форумах. Але галоўнае - абмеркаванне ключавых пытанняў і пошук альтэрнатыўных рашэнняў для ўсіх бакоў. Сёння такімі з'яўляліся праект новага мытнага кодэкса ЕАЭС і бюджэт саюза на наступны год.
Наконт чаго дамовіліся на гэтую гадзіну, ведае Наталля Брэус.
Еўразійскі эканамічны саюз яшчэ зусім малады - яму няма і двух гадоў. Пачынаўся ён з тройкі ўдзельнікаў - Беларусі, Расіі і Казахстана. Потым дадаліся Арменія і Кыргызстан. Разлічвалі, што інтэграцыя стане для краін такой своеасаблівай страхоўкай. Сусветная сітуацыя сёння выпрабоўвае саюз на трываласць.
Адчулі дзяржавы - удзельнікі еўразійскай інтэграцыі зніжэнне тавараабароту. Таму і ўсе намаганні партнёраў накіраваныя на эканамічнае ўзаемадзеянне. І калі на прэзідэнтах блока ў першую чаргу пытанні палітыкі, то за прэм'ерамі менавіта эканоміка. У Мінску сёння кіраўнікі ўрадаў пяці краін. Усе прыбылі ў беларускую сталіцу без спазненняў.
Сёлета Еўразійская камісія актыўнічае ў прапрацоўцы пагадненняў аб зонах свабоднага гандлю. Гэта ў прыярытэтах старшыні Казахстана - максімум кантактаў з іншымі краінамі. Пагадненне аб зоне свабоднага гандлю заключана з В'етнамам. Цікавасць да працы з ЕАЭС праяўляюць Егіпет, Тайланд, Іран, Манголія, Кітай. Гэта ўсё добра, але беларускі бок прапануе глядзець у корань і рабіць так, каб у першую чаргу ўнутры аб'яднанняў у поўнай меры дзейнічалі прынцыпы, што дэклараваліся першапачаткова, - існаванне і гандаль без абмежаванняў, вынятак і бар'ераў. У такім разе і дадатковай рэкламы саюзу не спатрэбіцца. Беларусь выступала менавіта за гэта і ў 2015-м - у год нашага старшынства ў Еўразійскім саюзе. Гэтых прынцыпаў прытрымліваецца і зараз.
На парадку дня міжурадавага савета дзясятак пытанняў. Прэм'еры абмяркоўваюць праект Мытнага кодэкса. Гэта доўгачаканы дакумент. Размова таксама ідзе пра тое, як аптымізаваць кантроль за перамяшчэннем тавараў на тэрыторыі ЕАЭС, і пра гандлёвую палітыку. У прыватнасці, прымяненне антыдэмпінгавых мер. На парадку дня і бюджэт арганізацыі на наступны год. Не выключана, што на палях саміту пройдуць і двухбаковыя сустрэчы.
Гэтымі днямі Мінск стаў вялікай перагаворнай пляцоўкай не толькі для Еўразійскага міжурадавага савета. Заўтра пройдзе сустрэча прэм'ераў краін СНД. Напэўна, невыпадкова гэтыя мерапрыемствы праходзяць разам. Фармат сустрэч розны, але і для аднаго аб'яднання, і для другога актуальнае пасоўванне эканомікі.
