Сёння ў Мінску прадстаўнікі Дзяржаўнага мытнага камітэта расказалі аб змяненнях, якія прадугледжвае новы Мытны кодэкс. Ён павінен уступіць у сілу з 1 студзеня 2018 года. Сярод магчымых новаўвядзенняў - стварэнне магазінаў бяспошліннага гандлю на ўездзе ў краіны ЕАЭС, у тым ліку і Беларусь. Акрамя таго, будуць перагледжаны ліміты на міжнародныя паштовыя адпраўленні.
Гэтым зоймецца Еўразійская эканамічная камісія. Беларусь можа разгледзець пытанне аб карэкціроўцы і на нацыянальным узроўні - гэты момант прадугледжаны ў праекце прэзідэнцкага ўказа аб ратыфікацыі новага Мытнага кодэкса.
Уладзімір Арлоўскі, першы намеснік старшыні Дзяржаўнага мытнага камітэта Беларусі: "У новым кодэксе ліквідаваны калізіі і прабелы, якія ёсць зараз у мытным заканадаўстве Мытнага саюза. Важна адзначыць, што з самага пачатку працы над кодэксам актыўны ўдзел прымалі прадстаўнікі бізнес-супольнасці ўсіх краін ЕАЭС. Гэта дакумент прамога дзеяння, у аснову якога леглі сучасныя стандарты".
У праекце прэзідэнцкага ўказа таксама прапісаны змяненні і па свабодных эканамічных зонах, для якіх маюць намер спрасціць правілы мытнага рэгулявання. Прадугледжана магчымасць стварэння СЭЗ з асаблівым прававым статусам - "тэрытарыяльныя". Зоны з максімальным спрашчэннем. У Беларусі такіх будзе дзве, у Расіі тры, у астатніх краінах саюза па адной.
