Як інавацыйны падыход да справы дапамагае аграрыям - у рэпартажы Юрыя Карняловіча.
Колькі карова дае малака, які ў яе рацыён харчавання і ці чакаць прыбаўлення ў найбліжэйшай перспектыве - уся гэтая інфармацыя ў рэжыме рэальнага часу. У адрозненне ад аператараў, якія працуюць непасрэдна з жывёламі, заатэхнік-селекцыянер за ўсімі працэсамі сочыць пры дапамозе камп'ютарнай праграмы.
Для гаспадаркі "Ханчыцы-Нёман" жывёлагадоўля - галоўны напрамак.
Атрыманне якаснага малака тут паставілі на навуковую аснову. Узвялі сучасны малочна-таварны комплекс, адабралі толькі высокапрадукцыйныя пароды кароў. Рацыён харчавання складаюць літаральна да грама для кожнай групы жывёл. Каб збалансаваць усе мікра- і макраэлементы, нават збожжа прарошчваюць. Для гэтага адкрылі спецыяльную біялабараторыю.
Здаровыя жывёлы - залог якаснага малака
За здароўем жывёл сочыць ветэрынарная служба. Асноўны ўпор на прафілактыку захворванняў. Прышчэпкі, агляды, умацавальныя працэдуры.
Па надоях сельгаспрадпрыемства ў дзясятцы лепшых у краіне. За дзень на перапрацоўку адпраўляюць больш чым 20 тон малака вышэйшай якасці. А гэта стабільны даход. У гаспадарцы ў аснову асноў паставілі сучасныя аграрныя тэхналогіі. У выніку за 5 гадоў удоі павялічыліся практычна ў два разы. Калі ў 2017 годзе карова давала 16 літраў малака за суткі, то сёння гэтая лічба большая за 30. Прычым, усё малако выключна экстра-класа.
Забяспечыць якаснымі кармамі ўласнае пагалоўе - задача ўжо агранамічнай службы гаспадаркі. Сярэдняя ўраджайнасць збожжавых тут 50 цэнтнераў з гектара. Сена, сілас і сянаж нарыхтоўваюць нават з перспектывай продажу. Адсюль і сродкі, якія накіроўваюць на мадэрнізацыю вытворчасці.
Прадоўжыцца і мадэрнізацыя памяшканняў для захоўвання збожжа і абнаўленне машыннага парка.