Адказы ў нашага карэспандэнта Святланы Лук’янюк.
Праект бюджэту - гэта заўсёды баланс жаданага і магчымага
Як спрацуе эканоміка: рэальны сектар, малы бізнес, сфера паслуг і ацэнка знешняй кан'юнктуры рынку. За аснову нашага галоўнага фінансавага дакумента 2020 узяты базавы або кансерватыўны сцэнарый, дзе рост ВУП - 1,9 %. Так, без залішняга аптымізму, з аглядкай на асноўных гандлёвых партнёраў, якія таксама асцярожныя з прагнозам. Бо апошнім часам аб'ём сусветнага экспарту-імпарту зніжаецца, гэта нельга не ўлічваць.Бюджэт захавае сацыяльную скіраванасць
Але самае важнае - казна застаецца сацыяльна арыентаванай. Зарплату бюджэтнікаў плануюць захоўваць на ўзроўні 80 % да сярэдняй па краіне, павялічваючы пры гэтым матэрыяльную падтрымку ўрачоў і настаўнікаў. Пенсіі індэксаваць раз на квартал. Грошы спланаваны і на сямейны капітал, субсідыі на будаўніцтва і на выплаты ветэранам да 75-годдзя Перамогі. Мінімалку і спажывецкі бюджэт зраўнуюць.Прыбыткі казны практычна не зменяцца ў параўнанні з гэтым годам. Негатыўны ўплыў на папаўненне агульнай скарбонкі звязваюць з расійскім падатковым манеўрам, пакуль не вызначанай цаной на газ і зніжэннем аб'ёмаў экспарту калійных угнаенняў.
У наступным годзе будзем жыць з дэфіцытам, значыць па сродках і без лішніх выдаткаў
Бюджэт-2020 звярстаны з інфляцыяй не вышэйшай за 5 %, стаўкай рэфінансавання з вілкай 9,5 і цаной за барэль нафты ў 60 долараў. У наступным годзе будзем жыць з дэфіцытам, значыць па сродках і без лішніх выдаткаў, але з рэзервамі для росту.Каля 9 мільярдаў рублёў пойдзе на пагашэнне і абслугоўванне дзярждоўгу. Да канца года плануем аформіць і кітайскі крэдыт на 500 мільёнаў долараў. Гэта пацвердзіў Мінфін. Выказаўшы, дарэчы, і свой пункт погляду аб павелічэнні прыбыткаў на гады наперад. Размова ідзе аб пераглядзе некаторых падатковых ільгот, не, не сацыяльных, а, напрыклад, па ПДВ.
