Беларусь і Расія да канца года прымуць рашэнне аб далейшай схеме разлікаў за пастаўкі газу ў нашу краіну. Аб гэтым сёння заявіў міністр энергетыкі Уладзімір Патупчык на адкрыцці Беларускага энергетычнага і экалагічнага форуму ў Мінску.
Новая формула будзе актуальная з ліпеня 2019 года. Да гэтага часу павінна быць створана агульная электраэнергетычная прастора краін - удзельніц ЕАЭС. А да 2025 года - адзіны рынак газу, нагадаў міністр. Гэта мяркуе стварэнне роўных умоў для вытворцаў энергіі, а пасля і спажыўцоў газу ў абедзвюх краінах. Кіраўнік Мінэнерга таксама адзначыў, што Мінскам і Масквой знятыя ўсе праблемныя пытанні ў гэтай сферы. Да 2019-га кошт расійскага газу для Беларусі складзе 132 долары за тысячу кубаметраў.
Уладзімір Патупчык, міністр энергетыкі Беларусі: "У рамках гэтага рашэння беларускі бок павінен да 20 кастрычніка бягучага года разлічыцца па недаплаце беларускім бокам за газ на працягу 2016 года. З улікам гэтых акалічнасцяў беларускі бок таксама прапанаваў расійскаму боку для стварэння аднолькавых умоў для гаспадарчых суб'ектаў прыняць адпаведныя рашэнні, якія дазволяць беларускім энергетыкам зблізіць цэны на газ з энергетыкамі РФ. Гэтае збліжэнне будзе адбывацца раўнамерна да пачатку функцыянавання электраэнергетычнага рынку за кошт міжбюджэтнага кампенсавання з боку РФ".
Таксама знятыя ўсе пытанні паміж краінамі і ў нафтавай спрэчцы. Масква пагадзілася аднавіць пастаўкі нафты ў поўным аб'ёме, а Мінск у сваю чаргу - вярнуць ранейшыя тарыфы на транзіт расійскай сыравіны па сваёй тэрыторыі.
