1 чалавек загінуў на месцы, 9 - дастаўлены ў бальніцу. Такі вынік аварыі ва Ушацкім раёне. У шэсць гадзін раніцы на трасе сутыкнуліся маршрутнае таксі і аўтамабіль МАЗ, які перавозіў бульдозер. У маршрутцы ў гэты момант знаходзіліся 15 пасажыраў і вадзіцель. Па факце ДТЗ узбуджана крымінальная справа. Падрабязнасці ў нашага карэспандэнта Вольгі Маслоўскай.
Рух на трасе Полацк - Мінск каля вёскі Сарочына сёння быў ускладнены на працягу некалькіх гадзін. На месцы аварыі працавала следча-аператыўная група.
ДТЗ адбылося каля шасці гадзін раніцы. Маршрутнаму таксі, якое выконвала рэйс з Полацка ў Мінск, не ўдалося размінуцца з грузавіком МАЗ. А больш дакладна, з бульдозерам, які быў усталяваны на трале велікагруза. Сутыкненне адбылося па датычнай. Нож-адвал бульдозера, які выходзіў за габарыты трала, зачапіў і фактычна знёс левае крыло мікрааўтобуса.
Уладзімір Назарка, начальнік УДАІ УУС Віцебскага аблвыканкама: "МАЗ перавозіў буйнагабарыт, які выступаў за габарыты транспартнага сродку каля паўметра. Упэўнена можна гаварыць пра тое, што вадзіцель ажыццяўляў перавозку, не маючы спецыяльнага дазволу для ажыццяўлення перавозкі такой катэгорыі грузу. Акрамя таго, паводле слоў вадзіцеля маршрутнага таксі, не быў уключаны пробліскавы маячок аранжавага колеру. Адпаведна, не быў абазначаны гэты транспартны сродак належным чынам - як машына, што перавозіць небяспечны груз".
Аб аварыі аператыўным службам паведаміў вадзіцель, які праязджаў паблізу. Аўтамабілі хуткай дапамогі даставілі пацярпелых ва Ушацкую раённую бальніцу. Адзін чалавек - 29-гадовы жыхар Наваполацка - загінуў на месцы. Дзевяцярым, уключаючы вадзіцеля маршрутнага таксі, аказаная неабходная медыцынская дапамога.
Сяргей Сунгурцаў, пацярпелы: "Апрытомнелі, убачылі, што борта ў маршруткі няма. На шчасце, я сядзеў правей. Мы дапамагалі, выцягвалі людзей, пакуль не было хуткай, таму што ў цяжкім стане людзі былі".
Сяргей Майсееў, галоўны доктар Ушацкай цэнтральнай раённай бальніцы: "Двое знаходзяцца ў цяжкім стане. Зараз яны знаходзяцца ў аддзяленні рэанімацыі. З адной працуюць хірургі. Астатнія пацыенты з рознай ступенню траўм знаходзяцца ў аддзяленні. 4 чалавекі мы рыхтуем ужо на выпіску".
Сярод пацярпелых - жыхары Полацка, Наваполацка і адзін жыхар Барысава. Устанавіць усе дэталі страшнай аварыі следчым дапамогуць паказанні відавочцаў, а таксама відэа з відэарэгістратара. Гэта прылада была ўстаноўлена на лабавым шкле маршрутнага таксі.
Святлана Сахарава, афіцыйны прадстаўнік УСК Беларусі па Віцебскай вобласці: "Ушацкім раённым аддзелам Следчага камітэта ўзбуджана крымінальная справа па факце ДТЗ па частцы 2 артыкула 317 КК Рэспублікі Беларусь. Гэтае парушэнне ПДР або эксплуатацыі транспартных сродкаў, якое прывяло па неасцярожнасці смерць чалавека. Следчымі зроблены агляд месца здарэння з удзелам спецыялістаў Дзяржаўнага камітэта судовых экспертыз і магчымасцяў перасовачнай крыміналістычнай лабараторыі".
Усталявана, што бульдозер транспартавалі са сталіцы ў Полацк да месца будаўніцтва Полацкай гідраэлектрастанцыі. Пагрузку будаўнічай тэхнікі ажыццяўляла адна з мінскіх фірм.
За мінулыя суткі ў Віцебскай вобласці адбылося каля 60 дарожна-транспартных здарэнняў. Гэта ў тры разы больш, чым звычайна. У ДАІ гавораць аб празмернай саманадзейнасці вадзіцеляў пры дрэнных умовах надвор’я.
