Пераднавагоднія дні - час для куплі падарункаў, пачастункаў для святочнага стала і галоўнага атрыбута ўрачыстасці - елкі. Аднак гэта час для заробку не толькі для афіцыйных магазінаў і рынкаў, але і для нелегальных прадпрымальнікаў. У спробе сэканоміць хтосьці купляе прадукты і тавары сумніўнага паходжання, не падумаўшы, чым гэта можа абярнуцца. Яшчэ адзін вельмі сумніўны спосаб зберагчы грошы на святы - не купляць елку, а ссекчы яе самому ў лесе. Вось толькі абарочваецца такая эканомія, як правіла, для ўсіх аднолькава - сапсаванымі святамі і шматмільённымі штрафамі.
Прапанова і попыт самых папулярных навагодніх ценявых тавараў вывучыў Юрый Шаўчук.
Вадзіцель мікрааўтобуса так жартуе. Насамрэч у багажніку ў яго не аказалася ні аднаго навагодняга дрэва. Але праверыць фургон супрацоўнікі лясгаса былі абавязаны. Разам з дарожнай міліцыяй напярэдадні Новага года леснікі пастаянна праводзяць такія праверкі. Мэта адна - выявіць і затрымаць тых, хто лічыць за лепшае елку на святы не купляць, а незаконна высякаць.
Апроч такіх стацыянарных пастоў, леснікі пастаянна патрулююць свае ўгоддзі. Для гэтага нават узброіліся новымі тэхналогіямі: фотакамерамі і мабільнымі дадаткамі. Усё для таго, каб мінімізаваць незаконную высечку іглічных дрэў не толькі ў калядныя канікулы, але і круглы год.
Напрыклад, вось гэтай елцы, каб дасягнуць свайго памеру, спатрэбілася 10 гадоў. Наогул жа лясгасы абнаўляюць саджанцы. Яно і нядзіўна. Бо толькі ў Лагойскім раёне ў гэтым сезоне плануецца нарыхтаваць 4 тысячы елак.
Кожнаму, хто вырашыць сэканоміць у сярэднім 200 тысяч рублёў на куплі навагодняга дрэва, варта запомніць яшчэ некалькі лічбаў. Штраф за высечку елак вагаецца ад 900 тысяч да 54 мільёнаў рублёў. Усё залежыць ад прычыненай шкоды і ад таго, кім рабілася высечка.
Але рызыкнуць і зарабіць у перадсвяточныя дні хочуць не толькі нелегальныя прадаўцы елак. Мабыць, ні адзін навагодні стол не абыходзіцца без традыцыйнай далёкаўсходняй ікры. Бізнес на падпольным продажы гэтага далікатэсу наладзіў нейкі камерсант з Мінска. Прадпрымальнік закупляў тавар у Расіі і без усялякага афармлення прывозіў яго на продаж у Беларусь. Прычым якасць гэтага прадукта пад вялікім пытаннем.
Але, мабыць, самым распаўсюджаным і самым небяспечным відам заробку на Новы год застаецца продаж несертыфікаванай піратэхнікі. Пра сумныя наступствы гэтага забароненага промыслу гаварылася ўжо не раз, але аматары лёгкай нажывы працягваюць свой прыбытковы бізнес з года ў год. Напярэдадні супрацоўнікі падатковай арыштавалі чарговую буйную партыю шэрых петард.
Аператыўнікі не дапусцілі, каб на чорны рынак трапілі амаль 9 тысяч петард і феерверкаў вельмі сумніўнага паходжання. Чым магло б скончыцца выкарыстанне гэтай піратэхнікі, зараз застаецца толькі здагадвацца. Але так або інакш сумных прыкладаў, калі эканомія на феерверках заканчвалася трагедыяй, хапае. Таму спецыялісты настойваюць: каб не сапсаваць сабе святы, прадукты і навагоднюю атрыбутыку ўсё ж лепш купляць у афіцыйных прадаўцоў.
