Колькасць ахвяр землетрасенняў, якія працягваюцца ў цэнтральнай частцы Японіі, узрасла да 62 чалавек, паведамляе БЕЛТА.
Больш чым 100 чалавек атрымалі розныя траўмы. Большасць ахвяр і пацярпелых - жыхары прэфектуры Ісікава. Пажары, справакаваныя землетрасеннямі, у гэтай мясцовасці знішчылі звыш 200 жылых дамоў, звыш 100 пабудоў разбураны падземнымі штуршкамі. На месцы разбораў завалаў ратавальнікі, работнікі экстранных служб, салдаты, накіраваныя ў раён бедства, працягваюць пошук людзей.
З-за наступстваў землетрасення эвакуіравана амаль 60 тыс. жыхароў прэфектур Ісікава, Ніігата і іншых абласцей. Больш як 33 тыс. дамоў працягваюць заставацца без электрычнасці, у пацярпелых рэгіёнах назіраюцца перабоі ў рабоце інтэрнэту і мабільнай сувязі, водазабеспячэння.
З панядзелка, 1 студзеня, у Японіі адбылося ўжо звыш 300 землетрасенняў рознай сілы, магнітуда самага магутнага з іх склала 7,6. Пагроза цунамі для ўсяго заходняга ўзбярэжжа краіны захоўвалася больш чым 20 гадзін. Землетрасенне стала самым магутным для гэтай часткі Японіі з 1885 года. Сейсмалагічная актыўнасць у гэтым раёне захаваецца яшчэ на працягу тыдня.
