Адной з тэм, што найбольш абмяркоўваецца ва Украіне, застаецца магчымы разрыў дыпламатычных сувязяў з Расійскай Федэрацыяй. Размова ідзе аб падрыхтоўцы законапраекта "Аб рэінтэграцыі Данбаса".
Напярэдадні ў праект была ўнесена папраўка аб разрыве дыпламатычных адносін паміж Украінай і Расіяй. Гэта аб’явіў народны дэпутат ад фракцыі "Народны фронт" Андрэй Цецярук.
У выпадку прыняцця законапраекта ўкраінскі парламент за трохмесячны тэрмін павінен ініцыіраваць разрыў дыпадносінаў, наладжаных з Масквой у 1992 годзе. У гэтым выпадку пасольствы будуць закрытыя, а дыпламатычны персанал адкліканы. Законапраект у другім чытанні дэпутаты разгледзяць 16 лістапада. Зрэшты, далейшы лёс дакумента вызначыць подпіс прэзідэнта Украіны, які не падтрымлівае ідэю разарваць дыпламатычныя адносіны з Расіяй. Гэта пацвердзіў дэпутат Рады ад партыі "Блок Пятра Парашэнкі" Іван Віннік. Пакуль ідэя застаецца на разглядзе камітэта.
