У Турцыі збіты расійскі ваенны самалёт

Ён упаў недалёка ад турэцка-сірыйскай мяжы. Як паведамляе Мінабароны Расіі, Су-24 пацярпеў крушэнне ў Сірыі, як мяркуецца, у выніку абстрэлу з зямлі. Бамбардзіроўшчык знаходзіўся на вышыні 6 тысяч метраў у небе выключна над тэрыторыяй Сірыі, што зафіксавана сродкамі кантролю, падкрэсліваюць у ведамстве. У сваю чаргу, у Мінабароны Турцыі гавораць, што збіты расійскі самалёт быў некалькі разоў папярэджаны аб парушэнні паветранай прасторы - за 5 хвілін было 10 папярэджанняў, перадае агенцтва Reuters са спасылкай на турэцкага чыноўніка. Лёс лётчыкаў пакуль невядомы. Паводле папярэдніх звестак, пілотам удалося катапультавацца. Адзін з пілотаў збітага самалёта трапіў да сірыйскіх паўстанцаў, паведамляе "Дойче веле" са спасылкай на турэцкія СМІ. У Мінабароны Расіі гэтую інфармацыю пакуль не пацвярджаюць. НАТА абяцае ў хуткім часе зрабіць заяву па гэтым інцыдэнце.