Лайнер, нагадаем, пацярпеў крушэнне напярэдадні праз некалькі хвілін пасля вылету з Дамадзедава. На борце знаходзіўся 71 чалавек - усе загінулі. Сярод версій трагедыі - тэхнічныя непаладкі і чалавечы фактар. У Падмаскоўі працягваецца пошукавая аперацыя. Знойдзена больш за 400 фрагментаў цел і звыш 300 абломкаў самалёта. Іх даставяць у спецыяльны ангар, дзе будзе праходзіць так званая выкладка. Яна павінна дапамагчы аднавіць ход падзей, якія прывялі да гібелі паветранага судна і яго пасажыраў.
Расказвае Дар'я Белавусава-Пятроўская.
Самалёты прыбываюць па раскладзе, пасажыры спяшаюцца да стоек рэгістрацыі. Як бачыце, аэрапорт Дамадзедава працуе ў звыклым штатным рэжыме. Але сёння тут цэлы дзень праводзіць няпланавую праверку Растранснагляд. Яго мэта - дасканала праверыць усе службы, якія рыхтавалі да адпраўкі борт Ан-148 "Саратаўскіх авіяліній", які пацярпеў крушэнне ў Падмаскоўі.
У момант катастрофы на борце самалёта знаходзіўся 71 чалавек, у тым ліку трое дзяцей. Сеня ў памяць пра іх да табло вылетаў аэрапорта Дамадзедава прыносяць кветкі. Адна з версій трагедыі - самалёт не быў апрацаваны супрацьабледзяняльнай вадкасцю.
На месцы крушэння працягваюць працу МНС, супрацоўнікі Расгвардыі, прадстаўнікі Следчага камітэта, медыкі. Але аперацыя са статусу выратавальнай ужо перайшла ў статус пошукавай. Бо ніхто не выжыў. Зараз галоўная задача - сабраць усе фрагменты самалёта і вызначыць прычыну трагедыі. У аператыўным штабе, які працуе на месцы надзвычайнай сітуацыі, лічаць, што Ан-148 не разбураўся ў паветры. Пры падзенні засталася вялікая варонка. Гэта гаворыць пра тое, што самалёт ударыўся аб зямлю з поўнымі бакамі гаручага.
У асноўным усе загінуўшыя - гэта жыхары Арэнбургскай вобласці. Некалькі чалавек з Саратава і Санкт-Пецярбурга. Ёсць іншаземцы. Гэта грамадзяне Швейцарыі і Азербайджана. Усе тыя, хто знаходзіўся на борце самалёта, былі застрахаваныя. Сваякам загінуўшых выплацяць па 2 мільёны рублёў. Але зараз ім у першую чаргу патрэбна псіхалагічная дапамога. Сёння з Масквы ў Орск вылецеў борт МНС са спецыялістамі.
Максім Сакалоў, Міністр транспарту Расіі:
"Задача, якая стаіць перад урадавай камісіяй на дадзены момант, - гэта ўзаемадзеянне са сваякамі. Для гэтага ў Арэнбургскую вобласць адпраўлена дадатковая група спецыялістаў-псіхолагаў, а таксама ўрачоў, каб працаваць са сваякамі".
Наперадзе ў сваякоў яшчэ адна складаная працэдура - апазнанне цел загінуўшых. Яна будзе праводзіцца ў Маскоўскім бюро судовых экспертыз. Каб людзі не адчувалі яшчэ большы стрэс, экспертызу будуць праводзіць дыстанцыйна. У Орску медыкі возьмуць у сваякоў генетычны матэрыял, гэта ўзоры крыві і сліны, і прывязуць іх у Маскву. Працэдура не хуткая - на ўсталяванне сваяцтва часам ідзе да 2 месяцаў.
Сёння ў Арэнбургскай вобласці аб’яўлены дзень жалобы. У памяць аб загінуўшых ва ўсіх храмах і манастырах праходзяць памінальныя службы.
