Арсеналы апошніх, дарэчы, уначы папоўніліся агнястрэльнай зброяй і нават гранатамётамі - гэта зафіксавалі журналісты на відэакамеры, а таксама медыкі, якія даставалі кулі з параненых. У той жа час міліцыі строга забаронена выкарыстоўваць зброю. Нагадаем, Кіеў з апоўначы на аблогавым становішчы. Усе дарогі, якія вядуць у горад, перакрытыя, зачыненыя чыгуначныя вакзалы, метро, не працуе іншы грамадскі транспарт. У дзіцячых садах і школах аб'яўлены выхадны.
Расказвае Андрэй Нікалаенка. Чарговая хваля беспарадкаў накрыла ўкраінскую сталіцу пасля таго, як напярэдадні атрады Беркута не прапусцілі шматтысячны натоўп радыкалаў да будынка Вярхоўнай рады. У адказ на град з камянёў і кактэйляў Молатава ў свой бок праваахоўнікі пайшлі ў атаку. Натоўп, які адыходзіў да Майдана, падпаліў некалькі грузавікоў, разграміў будынак Дома афіцэраў, а таксама штаб-кватэру кіруючай Партыі рэгіёнаў. З наступленнем цемры сутыкненні ва ўкраінскай сталіцы толькі ўзмацніліся.
Спробы сілавікоў зачысціць Майдан прывялі да таго, што лідары правых адкрыта заклікалі сваіх прыхільнікаў выкарыстаць зброю. Як вынік - дзясяткі чалавек загінулі, сотні былі параненыя. Паводле звестак МУС, толькі сярод праваахоўнікаў 9 забітых, звыш трох сотняў пацярпелых. Увесь цэнтр Кіева мінулай ноччу быў падобны на адно вялікае вогнішча.
Пратэстанты ўчынілі вогненную сцяну з падпаленых пакрышак, у выніку полымя перакінулася на шэраг будынкаў, у тым ліку Дом прафсаюзаў, з якога ратавальнікам атрымалася эвакуіраваць каля 40 чалавек.
Выйсце з крызісу ўначы спрабавалі знайсці ўдзельнікі сустрэчы лідараў апазіцыі з прэзідэнтам Віктарам Януковічам. Аднак перамовы скончыліся безвынікова. Пазней кіраўнік дзяржавы выступіў са зваротам да нацыі, у якім абвінаваціў радыкалаў у тым, што, заклікаўшы людзей да зброі, яны перайшлі небяспечную грань і павінны панесці за гэта пакаранне.
Віктар Януковіч, Прэзідэнт Украіны: Мой абавязак як гаранта Канстытуцыі забяспечыць мір і парадак у краіне. Я зноў заклікаю лідараў апазіцыі, якія сцвярджаюць, што яны таксама жадаюць мірнага ўрэгулявання, адмежавацца ад радыкальных сіл, якія правакуюць кровапраліцце і сутыкненні з праваахоўнымі органамі. Тады гутарка з імі будзе зусім іншая. У мяне ёсць саветнікі, якія пераконваюць мяне выкарыстаць сілу. Але я заўсёды лічыў, што гэта няправільны шлях. Існуе больш эфектыўны спосаб знайсці агульную мову, дасягнуць кампрамісу пакуль яшчэ не занадта позна і спыніць канфлікт.
Трывожныя паведамленні мінулай ноччу прыходзілі і з рэгіёнаў. У Львове, Цярнопалі і Івана-Франкоўску радыкалы захапілі будынкі мясцовых адміністрацый і пракуратур, падпаленыя былі ўпраўленні МУС. Акрамя таго, у Львове каля дзвюх тысяч экстрэмістаў узялі штурмам адну з часцей унутраных войскаў. Раненні атрымалі 30 вайскоўцаў. Раніцай цэнтр Кіева па-ранейшаму ў дыме. Зараз сутыкненні актывістаў Еўрамайдана і праваахоўнікаў працягваюцца, хоць і не з такой сілай, як уначы. У паветры ўзрываюцца петарды, святло-шумавыя гранаты і кактэйлі Молатава. Сілы правапарадку зараз размясціліся на прылеглых да Майдана вуліцах, абкружыўшы такім чынам пратэстантаў. Нягледзячы на тое, што горад перакрыты, паведамляецца, што ім на дапамогу спрабуюць прарвацца групоўкі нацыяналістаў, якія прыбываюць з рэгіёнаў. У сувязі з тым, што адбываецца, Міністэрства абароны Украіны аб'явіла, што ўвесь састаў узброеных сіл пераведзены на ўзмоцнены рэжым службы. У прыватнасці, узмоцненая ахова ваенных арсеналаў, баз і іншых армейскіх аб'ектаў, каб не дапусціць раскрадвання зброі і боепрыпасаў.
Раней сёння шэраг сусветных палітыкаў і кіраўнік ААН выказалі гатоўнасць умяшацца ў сітуацыю ва Украіне і заклікалі бакі неадкладна спыніць гвалт і сесці за стол перамоў.
