Сумніўную ініцыятыву амерыканскага Прэзідэнта па ўварванні ў Сірыю гатова падтрымаць усё большая колькасць кангрэсменаў. З мілітарысцкімі планамі Барака Абамы пагадзіліся лідары Рэспубліканскай і Дэмакратычнай фракцый і спікер Палаты прадстаўнікоў. ЗША гатовыя пайсці на міжнароднае злачынства і парушыць Статут ААН. Якім шляхам паставяць дэмакратыю ў Сірыю і што пра гэта думаюць самі амерыканцы - раскажуць нашы карэспандэнты.
Расказвае Юрый Казлоў. Нага амерыканскага салдата не ступіць на зямлю Сірыі. Гэта заява дзяржсакратара Джона Керы не абяцае Башару Асаду нічога добрага. Дэмакратыя прыбудзе ў Сірыю з паветра.
Пад крыкі пратэстантаў камітэт Сената ЗША па замежных справах адобрыў рэзалюцыю па ўварванні ў блізкаўсходнюю краіну. Паводле дакумента, паўнацэннай ваеннай аперацыі з выкарыстаннем наземных сіл Пентагон праводзіць не будзе. На гэта ў Вашынгтона не хопіць грошай. Абама абмяжуецца кропкавымі авіяўдарамі. На ваенную аперацыю будзе адведзена 60 дзён з магчымасцю аднаразовага прадаўжэння бамбёжак яшчэ на месяц. Амерыканскія палітыкі адзін за адным публічна падтрымліваюць сумніўную кампанію, ад удзелу ў якой раней адмовіліся амаль усе краіны НАТА. У тым ліку найбліжэйшы саюзнік ЗША - Вялікабрытанія.
Дарэчы, падчас разгляду антысірыйскай рэзалюцыі адбыўся невялікі канфуз. На слуханні запрасілі галоўнага ваеннага эксперта ЗША - ястраба Джона Макейна - майстра бокса па перапісцы і гразу самалётаў. За ваенную кар'еру, яго адважна можна было прадставіць да вышэйшай узнагароды СССР - Макейн знішчыў цэлых пяць крылатых амерыканскіх машын. Макейн падтрымліваў усе войны, у якіх удзельнічалі ЗША, - Ірак, Лівія, Афганістан, пяць з паловай гадоў правёў у в'етнамскім палоне. Здавалася б, менавіта гэты сенатар павінен быў прадставіць план сірыйскага бліцкрыгу. Але замест гэтага Макейн употай рэзаўся ў покер на смартфоне. У ЗША жартуюць, што сенатар трэніраваў кемлівасць. З ёй з часоў в'етнамскага палону ў Макейна сур'ёзныя праблемы. Сам ястраб пазней прызнаўся ў Твітары, што прайграў партыю камп'ютару.
Тым часам міжнародная супольнасць жорстка адрэагавала на амерыканскую рэзалюцыю. Генсак ААН Пан Гі Мун назваў ўварванне злачынствам.
Пан Гі Мун, Генеральны сакратар ААН: Прымяненне сілы законна толькі ў выпадку самаабароны, пра гэта сказана ў Статуце ААН, або пры ўмове адабрэння такіх дзеянняў Саветам Бяспекі. Гэта прынцыповая пазіцыя Арганізацыі Аб'яднаных Нацый.
Справа ў тым, што ў ЗША няма ніякіх доказаў, што хімічную зброю ў Сірыі прымянялі войскі Асада, а не баевікі. Як адзначыў Пан Гі Мун, пачынаць ваенную аперацыю да абвяшчэння вынікаў расследавання экспертаў ААН процізаконна. Дарэчы, ужо заўтра ўзоры, узятыя пад Дамаскам перададуць у Гаагу, дзе іх вывучэннем зоймуцца спецыялісты. Неўзабаве інспектары ААН вернуцца ў Сірыю і прадоўжаць расследаванне.
Башар Джафары, прадстаўнік Сірыі ў ААН: Хто дазволіў амерыканскай адміністрацыі прадказваць высновы місіі ААН? Чаму ЗША дзейнічаюць у аднабаковым парадку, выступаючы супраць рашэнняў ААН? Хто прызначыў Абаму наглядальнікам за светам? У Вашынгтоне гавораць, што размова не ідзе аб змене ўлады ў Сірыі. А яны ведаюць, хто прыйдзе да ўлады ў краіне пасля ўварвання? Гэтыя заявы бессэнсоўныя, як з палітычнага, так і з ваеннага пункта погляду.
Сітуацыя з уварваннем парадаксальная. Улады настойваюць на неабходнасці ўдару па Сірыі, а вось жыхары ЗША амбіцый урада не падзяляюць.
Паводле апытанняў, супраць уварвання ў Сірыю выступае 56 працэнтаў амерыканцаў. За - усяго 19. У глабальнай сетцы Асад карыстаецца яшчэ большай падтрымкай. Паводле інфармацыі Voxpopuli Дамаск падтрымліваюць больш як 85 працэнтаў інтэрнэт-карыстальнікаў. Антываенныя пратэсты праходзяць па ўсім свеце, але адміністрацыю Абамы гэта не бянтэжыць. Рашэнне ўжо прынята. Паводле даных New York Times, у Сірыю пачалі таемна пранікаць баявыя падраздзяленні, падрыхтаваныя ЦРУ. Справа засталася за малым - працягнуць мілітарысцкую рэзалюцыю праз Кангрэс - вырашальнае галасаванне адбудзецца на наступным тыдні.
Між тым, з пачатку канфлікту, які без падтрымкі Захаду не пачаўся б наогул, з Сірыі збеглі 2 мільёны чалавек. Пацярпелі 7 мільёнаў. Гэта траціна жыхароў дзяржавы. Зараз з Сірыі эвакуіруюцца замежныя грамадзяне. Пакінуць тэрыторыю арабскай краіны рэкамендуе і МЗС Беларусі
