Тэракт у метро Санкт-Пецярбурга мог учыніць ураджэнец Кыргызстана. Такую інфармацыю пацвердзілі ў сілавых ведамствах краіны. Пры гэтым падазроны меў расійскае грамадзянства. Называецца і яго імя - Акбаржон Джалілаў 1995 года нараджэння.
Зараз высвятляецца, калі ён прыехаў у Расію. Таксама вызначаюцца яго роднасныя і радыкальныя сувязі. У Піцеры ўзмоцнены меры бяспекі. Сёння раніцай з-за безгаспадарнай сумкі часова не працавалі дзве станцыі метро. Была закрыта і станцыя "Сянная плошча" пасля ананімнага званка аб пагрозе выбуху. Паведамленні аб магчымых атаках не спыняюцца. У Дзярждуме Расіі загаварылі аб неабходнасці зрабіць больш жорсткім антытэрарыстычнае заканадаўства. Не выключаецца вяртанне смяротнай кары за такія злачынствы, як тэракт.
Разам з расіянамі па людзях, якія загінулі ў метро Санкт-Пецярбурга, смуткуе ўвесь свет. Спачуванні выказваюць лідары многіх краін. Узрушаныя здарэннем у АБСЕ і Парламенцкай асамблеі Савета Еўропы. У Савеце Бяспекі ААН выбух асудзілі і заклікалі знайсці арганізатараў.
У Паўночнай сталіцы Расіі трохдзённая жалоба. Тое, што адбылося, пецярбуржцы ўспрымаюць асабіста, нясуць кветкі да станцый метро, дзе прагрымеў выбух. Дзясяткі чалавек па-ранейшаму ў клініках. Многім спатрэбілася хірургічная дапамога, у тым ліку і беларусу, пацярпеламу ў выніку тэракта. Жыхар Гродна працуе на чыгунцы Расіі кандуктарам грузавых цягнікоў. Прыехаў у Пецярбург на сустрэчу з сябрамі. Падчас надзвычайнага здарэння знаходзіўся ў тым самым вагоне, дзе прагрымеў выбух. Нягледзячы на раненні, лічыць, што нарадзіўся ў кашулі. Ён прабудзе ў бальніцы яшчэ два тыдні.
Работу ў шпіталях Пецярбурга каардынуе міністр аховы здароўя Расіі. Вераніка Скварцова пацвердзіла, што колькасць ахвяр павялічылася ад 11-ці да 14-ці.
Вераніка Скварцова, міністр аховы здароўя Расіі: "Практычна ва ўсіх баратраўма, пашкоджанне ўнутраных органаў, ампутацыя і пераломы канечнасцяў, цяжкія чэрапна-мазгавыя траўмы. Некалькі чалавек з апёкамі".
Ахвяр магло быць больш, калі б не правільныя дзеянні машыніста, лічаць следчыя. Ён шмат у чым аблегчыў працу ратавальнікаў. Машыніста прадставяць да ўзнагароды за выратаванне пасажыраў.
Аляксандр Каверын, машыніст цягніка: "Я прыняў рашэнне згодна з інструкцыяй па дзеяннях у такіх выпадках. У гэтай сітуацыі я абавязаны быў вывесці цягнік на станцыю, што я і зрабіў".
Спачуванні ў сувязі з трагедыяй у Пецярбургу прыходзяць у Расію з усяго свету. Сусветныя лідары падкрэсліваюць: з тэрарызмам можна і трэба змагацца разам. У буйных гарадах выводзяць дадатковыя нарады праваахоўнікаў, пад асаблівы кантроль узятыя вакзалы, аэрапорты, гандлёвыя цэнтры.
Дзяніс Мом, турыст (Нідэрланды): "У свеце заўсёды ёсць месца пагрозам. Можна ўвесці мноства розных мер бяспекі, але, на жаль, нам не ў сілах усё на свеце прадухіліць. Мы вымушаныя назіраць трагедыі. Нам, на жаль, даводзіцца мірыцца з гэтым".
Гора аб'яднала ўзрушаных трагедыяй пецярбуржцаў. Людзі дапамагалі адно аднаму, чым маглі, - адзеннем, прадуктамі, бясплатна падвозілі да дома выпадковыя вадзіцелі.
Улады Пецярбурга выдзеляць 23 мільёны рублёў для дапамогі сем'ям загінуўшых і пацярпелым.
