Лідар тэрарыстычнай групоўкі "Ісламская дзяржава" Абу Бакр аль-Багдадзі заклікаў да супраціўлення ў Масуле. Аўдыязапіс стаў першай заявай аль-Багдадзі пасля пачатку аперацыі іракскіх і курдскіх вайскоўцаў пры падтрымцы сіл міжнароднай кааліцыі па вызваленні горада.
Іракскія вайскоўцы тым часам прасоўваюцца далей. Наступленне на Масул з некалькіх кірункаў вядуць урадавыя войскі, сілы курдаў і шыіцкае апалчэнне. Напярэдадні стала вядома, што вайскоўцам удалося адрэзаць шлях, па якім баевікі перамяшчаліся паміж Масулам і Ракай, якія яны лічаць "сталіцамі" сваіх іракскіх і сірыйскіх уладанняў.
