Як адзначыў Джэрэмі Корбін, Вялікабрытанія павінна дзейнічаць рашуча, але на аснове дакладных доказаў. Раней прэм'ер-міністр Злучанага Каралеўства Тэрэза Мэй абвінаваціла Маскву ў атручванні экс-разведчыка Сергея Скрыпаля, які эміграваў на Туманны Альбіён, і яго дачкі Юліі. Мэй падкрэсліла, што гэты інцыдэнт трэба разглядаць, як прымяненне сілы супраць Вялікабрытаніі. У адказ Лондан вышле 23 расійскіх дыпламатаў і замарозіць кантакты з Масквой на высокім узроўні. Акрамя таго, вядома, што брытанскія чыноўнікі і члены каралеўскай сям'і адмовяцца ад наведвання чэмпіянату свету па футболе ў Расіі. У Крамлі, між тым, адмаўляюць абвінавачанні ў дачыненні да "справы Скрыпаля" і падкрэсліваюць, што Масква гатовая даць неабходныя для следства тлумачэнні, але па іх афіцыйна ніхто не звяртаўся.
Тэрэза Мэй, Прэм'ер-міністр Вялікабрытаніі:
"Было б правільна даць Расіі магчымасць даць тлумачэнні, але іх адказ прадэманстраваў поўнае пагарджанне сур'ёзнасцю гэтых падзей. Яны не заяўлялі аб магчымай страце кантролю над запасамі рэчываў нервова-паралітычнага дзеяння. Замест гэтага прадстаўнікі Расіі адказалі на нашы патрабаванні растлумачыць інцыдэнт у Солсберы з сарказмам і адмаўленнем. Г.з. не можа быць іншай высновы, акрамя таго, што расійская дзяржава вінаватая ў замаху на забойства спадара Скрыпаля і яго дачкі".
Таксама стала вядома, што брытанскі бок адклікаў запрашэнне Сяргею Лаўрову наведаць Лондан з візітам. У расійскім МЗС на гэта адказалі, што міністр гэта запрашэнне і не прымаў. Гэтым вечарам, як чакаецца, здарэнне ў Солсберы абмяркуе Савет Бяспекі ААН.
66-гадовы экс-супрацоўнік ГРУ Сяргей Скрыпаль і яго 33-гадовая дачка Юлія былі атручаны нервова-паралітычным рэчывам у англійскім Солсберы 4 сакавіка. Зараз пацярпелыя знаходзяцца ў шпіталі. Урачы ацэньваюць іх стан як крытычны.
