У спісах загінуўшых ужо 273 чалавекі. Яшчэ сотні паранены. І столькі ж лічацца прапаўшымі без вестак. Зараз людзей, якія засталіся без даху над галавой, размяшчаюць у палатках.
Пацярпелыя вымушаны заставацца ў зоне стыхійнага бедства, пакуль улады не дадуць ім новы прытулак. А Італію ўсё працягвае трэсці. За мінулыя суткі зафіксавана каля 500 новых падземных штуршкоў. Апошні - у раёне 16:00 па нашым часе - прывёў да панікі і новых разбурэнняў. Спачуванні Прэзідэнту Італіі Серджыа Матарэле, а таксама родным і блізкім загінуўшых і пацярпелых выказаў Кіраўнік беларускай дзяржавы Аляксандр Лукашэнка. У спачуванні адзначаецца, што вестка аб шматлікіх ахвярах і значных разбурэннях выклікала пачуццё вялікага болю і смутку ў сэрцах беларусаў. У Італіі прыспушчаны флагі, аб'яўлена двухдзённая нацыянальная жалоба.
Матэа Рэнці, Прэм'ер-міністр Італіі:
"Момант, які зараз перажывае Італія, гэта не проста эмоцыі, гэта момант дзеяння. Я з поўнай упэўненасцю магу сказаць, што Італія ведае, што трэба рабіць у цяжкі час. Тады, калі справы ідуць не самым лепшым чынам, уся краіна дэманструе свой лепшы бок. Ад імя ўрада я даю слова, што мы не пакінем без падтрымкі ні аднаго чалавека, які пацярпеў пры землетрасенні. Таму зараз я заклікаю ўсіх працягваць пошукава-выратавальныя работы і не страчваць надзею на выратаванне тых, хто дагэтуль знаходзіцца пад заваламі".
Ратавальнікі і валанцёры ні на хвіліну не спыняюць пошукі. На гэтых кадрах бачна, як яны вызваляюць з-пад завалаў 8-гадовую дзяўчынку. Дзіця правяло пад абломкамі як мінімум 17 гадзін.
