Сур'ёзнае абвастрэнне канфлікту на Блізкім Усходзе. Мінулай ноччу Іран ажыццявіў масіраваную атаку на Ізраіль. Яна стала адказам Тэгерана на ўдар Ізраіля па іранскім консульстве ў Дамаску. 1 красавіка там былі забіты сем іранскіх афіцэраў.
Усяго было выпушчана 185 беспілотнікаў, 36 крылатых ракет і 110 ракет класа "зямля-зямля" трыма серыямі, паведамляе "Нью-Ёрк таймс". Выбухі былі чутныя ў Іерусаліме і яшчэ некалькіх гарадах. Зафіксавана таксама серыя прылётаў у раёне Негеў на ізраільскай ваеннай базе "Рамон".
Ізраільскія вайскоўцы паведамляюць, што 99 % запушчаных снарадаў удалося перахапіць, большасць за межамі краіны. Іарданія дала сваю паветраную прастору ізраільскім і амерыканскім ВПС. У выніку дзясяткі асколкаў ад збітых снарадаў упалі на гарады каралеўства. Загінулі 3 чалавекі. У Ізраілі (на поўдні краіны) раненні атрымала дзяўчынка-бедуінка.
Корпус вартавых іранскай рэвалюцыі заявіў аб "паспяховым знішчэнні" важных ваенных цэляў. Дэлегацыя Тэгерана ў ААН назвала атаку самаабаронай у адпаведнасці са Статутам арганізацыі. Ізраіль у сваю чаргу паабяцаў даць "беспрэцэдэнтны адказ". Тэрміновае пасяджэнне Саветя Бяспекі ААН адбудзецца вечарам 14 красавіка.