Кіраўнікі МЗС краін "Вялікай сямёркі" не дамовіліся аб пашырэнні санкцый супраць Расіі і Сірыі. Гэта паведаміў кіраўнік Міністэрства замежных спраў Францыі Жан-Марк Эйро. Нягледзячы на тое што расследавання акалічнасцяў трагедыі ў сірыйскай правінцыі Ідліб не праводзілі, многія заходнія дзяржавы практычна адразу ўсклалі віну за хіматаку на афіцыйны Дамаск і на Маскву, якая аказвае ўраду Сірыі ваенную дапамогу. Планавалася, што пашырэнне санкцый прымусіць Крэмль спыніць падтрымку Башара Асада. Тым не менш большасць краін "сямёркі" (сярод іх і Германія) выказаліся супраць новых абмежаванняў.
Двухдзённая сустрэча кіраўнікоў МЗС "Вялікай сямёркі" ў Італіі праходзіць на фоне масавых пратэстаў. Маніфестанты патрабуюць надаваць больш увагі ўнутраным праблемам Еўрасаюза. Сотні людзей з плакатамі "Таскана супраць G7" паспрабавалі прарвацца ў раён, дзе засядаюць міністры. Дарогу перагарадзіла паліцыя. Пачаліся сутыкненні. Ёсць затрыманыя.
