Вечар пятніцы, 13-га стаў самым жудасным для парыжан. Найбуйнейшы тэракт у гісторыі краіны забраў жыцці больш як ста чалавек. На гэты момант вядома аб 153-х загінуўшых. Адразу некалькі аб'ектаў сталі мішэнню тэрарыстаў - учынена сем асобных нападаў. Тэрарыстычная групоўка "Ісламская дзяржава" ўзяла на сябе адказнасць за здарэнні. У Францыі ўведзена надзвычайнае становішча - закрытыя межы. Спачуванні Франсуа Аланду і ўсяму французскаму народу выказаў Прэзідэнт Беларусі Аляксандр Лукашэнка. Інфармацыя пра тое, што адбываецца ў Парыжы, пастаянна мяняецца і абнаўляецца. За ўсім, што адбываецца, сочаць нашы карэспандэнты.
Сама меней 100 чалавек заставаліся да раніцы ў заложніках у парыжскім тэатры "Батаклан". Як паведамляецца, стральба ў канцэртнай зале была чутная дзесьці праз паўгадзіны пасля пачатку канцэрта. Выступаў каліфарнійскі рок-гурт Eagles of Death Metal.
Паліцыя Парыжа мае звесткі пра восем тэрарыстаў. Усе яны загінулі. Сем чалавек, якія нападалі, як стала вядома, выкарысталі паясы смяротнікаў. Гэта паведаміла крыніца, блізкая да следства, піша сёння газета Liberation. Мяркуючы па ўсім, трое тэрарыстаў узарвалі сябе, а адзін быў забіты сілавікамі. Ліквідаваць яго ўдалося ўжо пасля нападу на тэатр "Батаклан".
Франсуа Аланд, Прэзідэнт Францыі: "Гэтай ноччу Парыж быў атакаваны. Я хачу ў першую чаргу выказаць спачуванні родным і блізкім загінуўшых. Мы з імі ў гэты жудасны і цяжкі момант. Я бы таксама хацеў падзякаваць паліцэйскім, супрацоўнікам мэрыі, усім тым, хто мінулай ноччу дапамагаў параненым. Многіх нам удалося выратаваць".
Трое баевікоў выкарысталі паясы шахідаў на стадыёне "Стат дэ Франс". Там у пятніцу вечарам праходзіў таварыскі матч з Германіяй. На ім прысутнічаў прэзідэнт Францыі Франсуа Аланд. Яшчэ адзін злачынец узарваў сябе на ажыўленым бульвары Вальтэра. Гэта 11-я акруга Парыжа.
Франсуа Мален, пракурор г. Парыжа: "Ідзе расследаванне. Як вы разумееце, гаварыць пра нейкія канкрэтныя вынікі яшчэ вельмі рана. Тэрарысты напалі ў шасці пунктах. Стадыён, Бульвар дэ Шарон - там загінулі, наколькі мне вядома, 18 чалавек, бульвар Вальтэра, вуліца Фантэн-о-Руа, скрыжаванне вуліц Алібер і Біша. Зараз наша галоўная задача - пошук памагатых".
Раней прэфект паліцыі Парыжа Мішэль Кадо таксама адзначыў, што ў праваахоўных органах французскай сталіцы лічаць усіх тэрарыстаў загінуўшымі. Тым не менш пошук магчымых памагатых тых, хто ўчыніў усе напады, працягваецца.
Усяго зафіксавана шэсць эпізодаў тэрарыстычнай дзейнасці, пракуратура ўзбудзіла крымінальныя справы. Па словах пракурора Франсуа Малена, у выніку серыі атак баевікоў загінулі не менш як 120 чалавек. Паводле звестак СМІ, агульная колькасць ахвяр ужо перавысіла 150.
13-га лістапада Францыя афіцыйна выйшла з Шэнгенскай зоны. Улады запэўнівалі, што мера часовая ў сувязі з правядзеннем у краіне міжнароднай канферэнцыі Арганізацыі Аб'яднаных Нацый па змяненні клімату. Ён павінен пачацца 30 лістапада. Прэса, зрэшты, лічыць, што міжнародны форум тут ні пры чым. Сапраўдная прычына - наплыў мігрантаў. Пагранпераходы былі ўзмоцненыя тысячамі паліцэйскіх, якія ажыццяўлялі выбарачны кантроль.
