Аб спорце ў цэлым і развіцці беларускага футбола ў прыватнасці сёння ішла размова ў Палацы Незалежнасці.
З дакладам у Прэзідэнта тыя, хто адказвае за сферу, - міністр, профільны віцэ-прэм'ер, кіраўнік НАК і старшыня футбольнай федэрацыі. Спорт вышэйшых дасягненняў - пад крылом дзяржавы. У краіне створаны ўсе ўмовы для дасягнення высокіх вынікаў. І калі такія ёсць, атлетаў гатовы заахвочваць.
Але Прэзідэнт упэўнены, што цяперашнія дасягненні ў спорце не параўнальныя з тым клопатам і ўкладаннямі, якія робіць дзяржава. Пры гэтым Аляксандр Лукашэнка заклікае не наракаць на санкцыі - нават зараз спартыўная канкурэнцыя захоўваецца.
Кіраўніка дзяржавы цікавіла становішча спраў не толькі ў футболе, але і ў іншых відах. Шматлікія вынікі нездавальняльныя. У іншых выпадках - нестабільныя, калі перамогі змяняюцца праваламі. Ужо сёлета ад нашых спартсменаў чакаюць прагрэсу і лепшых паказчыкаў.
Спартыўныя перамогі ў беларускага спорту ёсць. Але іх відавочна недастаткова - міністр прызнаў відавочнае. Асабліва калі ўлічыць, колькі краіна ўкладвае ў падтрымку і развіццё спорту. Аддача павінна быць больш прыкметнай. Для гэтага даручана правесці рэвізію ў кожным відзе спорту.
Асобныя даручэнні прагучалі наконт гульні нумар адзін. За паўгоддзе трэба будзе навесці парадак у сістэме падрыхтоўкі футбалістаў, забяспечыць плаўны пераход у моладзевую, а затым дарослую каманду. Абапірацца будуць на лепшыя практыкі мінулых гадоў, у тым ліку на савецкія методыкі.
