Уменне чуць і адчуваць адзін аднаго прадэманстравалі беларускія спартсмены. У сталіцы прайшоў турнір па інтуітыўным футболе для людзей з абмежаваным зрокам. На полі сустрэліся 12 каманд з розных абласцей Беларусі. Згодна з правіламі, у матчы маглі сустракацца футбалісты толькі адной катэгорыі. Так, напрыклад, цалкам пазбаўленыя зроку спартсмены гуляюць з завязанымі вачыма і выкарыстоўваюць цяжкі мяч. А спартсменам са слабым зрокам неабходны мяч яркага колеру.
Алег Кірылаў, галоўны трэнер зборнай Беларусі па футболе сярод невідушчых: "Падчас гульні адзін трэнер стаіць у цэнтры поля, другі трэнер за чужымі варотамі і трэнер-варатар стаіць у варотах. 3 гульцы відушчыя вядуць гульню, але гэта толькі на гульні. Тут гульцы бегаюць, скачуць, б'юць. На вуліцы мы, можна сказаць, бездапаможныя, а на пляцоўцы мы цары і богі".
Андрэй Малашэвіч, арганізатар турніру па інтуітыўным футболе: "У нас ёсць нацыянальная зборная Беларусі, гульцы якой з'яўляюцца шматразовымі чэмпіёнамі свету і Еўропы, а пра гэта практычна ніхто не ведае. Плюс яшчэ ёсць вялізная колькасць слабавідушчых, невідушчых, якія гуляюць у футбол, любяць футбол, таму мы вырашылі іх падтрымаць".
Нягледзячы на аматарскі ўзровень, трэніруюцца спартсмены рэгулярна. У іх ёсць мэта на наступны год - прайсці адбор на чэмпіянат Еўропы.
