II Еўрапейскія гульні ўбачаць на ўсіх кантынентах. На дадзены момант правы на тэлетрансляцыі прададзеныя на 122 тэрыторыі.
Цікавасць да мультыспартыўнага форуму выявілі не толькі краіны Старога Свету, але і ЗША, Новая Зеландыя, Кітай, Паўднёвая Амерыка і многія іншыя. У сярэднім аб'ём трансляцый на кожнай тэрыторыі складзе каля 70 гадзін.
Такія звесткі былі прыведзены сёння падчас прэс-канферэнцыі, прысвечанай арганізацыі тэлетрансляцый II Еўрапейскіх гульняў. Працаваць над асвятленнем галоўнага спартыўнага форуму года будзе інтэрнацыянальная каманда.
Яшчэ да старту, а таксама падчас і пасля Еўрапейскіх гульняў у эфіры каналаў Белтэлерадыёкампаніі будуць выходзіць амаль два дзясяткі разнастайных праектаў. Яны дапамогуць балельшчыкам не толькі даведацца нюансы відаў спорту, але і пазнаёміцца з нашымі спартсменамі, а таксама атрымаць поўную інфармацыю пра закуліссе мультыспартыўнага форуму. Напрыклад, ужо ў гэты чацвер гледачы "Беларусь 1" змогуць убачыць другі выпуск праекта Агенцтва тэленавін "Гульні.by". Аўтары распавядуць усё самае цікавае пра веласпорт і не толькі.
Больш за тое, наша творчая група адправіцца ў Рым, дзе 3 мая запаляць агонь Еўрапейскіх гульняў. А гэта значыць, што гледачы атрымаюць унікальную магчымасць прасачыць шлях агню ад яго зараджэння да фінальнага пункта - чашы стадыёна "Дынама".
Цырымоніі адкрыцця і закрыцця Еўрапейскіх гульняў у прамым эфіры - на "Беларусь 1". Тэлеканалы "Беларусь 2" і "Беларусь 5" у рэжыме пераклічкі пакажуць усе спартыўныя спаборніцтвы. Галоўны спартыўны канал краіны і зусім стане на гэты час кругласутачным.
Правы на тэлетрансляцыі II Еўрапейскіх гульняў ужо прададзеныя на 122 тэрыторыі
27 марта 2019