Беларускія біятланісты гучна заявілі пра сябе на шостым этапе Кубка свету ў Германіі і паказалі высокі вынік. Такім чынам, яны падтрымалі нашых дзяўчат, у якіх выступленні ў апошнія дні атрымаліся не такімі яскравымі, як увесь сезон.
Расказвае Андрэй Казлоў.
Пачынаем наш спартыўны агляд з біятлону. Беларускія мужчыны правялі самы лепшы біятлонны ўік-энд за 15 гадоў і заваявалі тры камплекты медалёў. Лепшы з нашых хлопцаў, безумоўна, гэта Антон Смольскі.
Смольскі, які нарадзіўся на Міншчыне, у Капылі, завяршыў шосты этап Кубка свету ў нямецкім Рупольдынгу і зноў на п'едэстале. Ён стаў трэцім у гонцы праследавання. Поспех Антона невыпадковы. Ён таксама быў трэцім напачатку этапу ў спрынце. У агульным заліку Кубка свету Смольскі ідзе на вельмі высокай, 7-й пазіцыі.
Дзінара Алімбекава таксама прыгожа завяршыла этап у Германіі - яна стала 6-й у гонцы праследавання. У заліку Кубка свету Дзінара Алімбекава захавала трэці радок.
Яшчэ раней адразу чатыры беларусы падняліся на подыум Кубка свету. Мікіта Лобастаў, Дзмітрый Лазоўскі, Максім Варабей і Антон Смольскі ўпершыню з 2006 года прынеслі Беларусі медаль у эстафеце.
Сёмы, перадалімпійскі, этап пройдзе на гэтым тыдні ў італьянскім Антхольцы.
Зборная Беларусі па гандболе правядзе яшчэ адзін матч на чэмпіянаце Еўропы, але пасля яго, на жаль, паедзе дадому. Напярэдадні каманда на чале з Юрыем Шаўцовым прайграла Польшчы ў ключавым для нас паядынку групавой стадыі - 20:29. Больш за ўсіх у беларусаў закінуў Вайлупаў - у яго 5 мячоў. У заключным матчы групы заўтра чакае сустрэча з Аўстрыяй.
Ягор Герасімаў і Аляксандра Сасновіч завяршаюць выступленне на Адкрытым чэмпіянаце Аўстраліі. Першы беларускі нумар - Ілья Івашка - зняўся з-за траўмы нагі, аб чым паведаміла прэс-служба спаборніцтваў і сам беларус у сваім "Інстаграме". А вось Вікторыя Азаранка ідзе далей. Яна перайграла венгерку Панну Удвардзі - 6:3, 6:1 і выйшла ў другі круг. Арына Сабаленка пачне барацьбу на кортах Мельбурна заўтра супраць аўстралійкі Сандэрс.
Валейбольная "Мінчанка" атрымлівае важную перамогу ў рамках барацьбы за месца ў плэй-оф Суперлігі. Беларускі святкавалі поспех у Краснаярску, перамаглі "Енісей" - 3:1. На гэты момант "Мінчанка" ў турнірнай табліцы займае 9-е месца і працягвае змагацца за пуцёўку ў накаут-раунд. Нагадаем, у мінулым сезоне каманда Станіслава Салікава завяршыла сезон на пятай пазіцыі.
На сёння ўсё. Але на гэтым тыдні будзе шмат цікавага спорту. Гэта і тэніс у Аўстраліі, і этап па біятлоне ў Італіі, гандбольны Еўра, а таксама баскетбольная ліга ВТБ, хакейная КХЛ і шмат іншага. Сачыце за тэлепраграмай "Беларусь 5".
