Заяўкі пададзеныя, заявак больш няма. На тыдні завяршыўся прыём варыянтаў талісмана ІІ Еўрапейскіх гульняў. Зараз чарга журы, якому прыйдзецца нялёгка. На адрас арганізатараў конкурсу паступіла больш за тысячу заявак. Пераможца і прызёраў абяцаюць назваць у снежні.
Мінск тым часам пачынае жыць Еўрагульнямі. У сталіцы з'явіліся білборды з анонсам спаборніцтваў, а на маніторах у метро і ў аэрапорце дэманструюць тызеры турніру. З'явіўся ў Еўрагульняў і першы медыяпартнёр. Прадстаўнікі дырэкцыі спаборніцтваў рыхтуюць даклад аб прагрэсе ў падрыхтоўцы спаборніцтваў на генеральнай асамблеі Еўрапейскіх алімпійскіх камітэтаў, якая пройдзе на наступным тыдні.
Алена Гарэльчык пра самае цікавае раскажа зараз.
Больш за тысячу сто заявак, і гэтая лічба працягвае расці. З такой колькасцю не зладзілася нават электронная пошта, таму апрацоўка даных у Міністэрстве інфармацыі ідзе і ў выхадныя. За перамогу ў конкурсе на талісман змагаюцца жыхары ўсіх абласцей краіны, адна заяўка прыляцела нават з Егіпта. Удод Хоп-хоп, Ярылка, Бульбазавр, Агеньчык, Вавёрка Верка. Адным словам, выбар будзе нялёгкім.
Некаторыя работы на тыдні былі выстаўленыя ў Рэспубліканскім доме моладзі. Дзякуючы чаму студэнты некалькіх ВНУ, каму атрымалася патрапіць на выставу, нават склалі свой неафіцыйны рэйтынг. Галасавалі не падабайкамі, а папяровымі яблыкамі.
Журы збярэцца ўжо ў пачатку тыдня. На першым этапе з усіх заявак выберуць некалькі дзясяткаў фаварытаў. Ці супадзе неафіцыйны студэнцкі рэйтынг з рэальным, даведаемся ўжо ў снежні. А прэзентацыя талісмана пройдзе ў адным з кінатэатраў першага медыяпартнёра Еўрапейскіх гульняў. Тут жа перад кінасеансам ужо дэманструецца тызер турніру.
Пра Еўрагульні жыхарам сталіцы нагадваюць вось такія білборды і расцяжкі - па ўсёй сталіцы размешчана каля 20 канструкцый. Тызеры Еўрагульняў можна ўбачыць на маніторах па ўсім будынку Нацыянальнага аэрапорта, аўтавакзала "Цэнтральны" і ў метро.
Каля 25 працэнтаў ад запланаванага медыяплана для прасоўвання Еўрагульняў будзе выканана ўжо сёлета. У наступным запланавана размясціць каля 60 працэнтаў рэкламнага кантэнту, у 2019 медыяплан будзе выкананы цалкам.
Аляксандр Сухараў - лідар некалі папулярнай групы "Эківокі" - са спортам на ты. Футбол, тэніс, у яго спартыўнай кар'еры тры пешыя туры - пешкі ад Мінска дайшоў да Брэста, Салігорска і Віцебска. Праўда, спаборнічаць больш любіць не ў спартыўных конкурсах, а ў музычных. Вось таму і падаў заяўку на конкурс песні для цырымоній адкрыцця і закрыцця Еўрагульняў.
Усе заяўкі на конкурс песні сцякаюцца ў Тэатр эстрады. Пераможцы конкурсу атрымаюць не толькі дыплом, але і грашовыя прэміі памерам 100, 70 і 50 базавых велічынь, а галоўнае - іх музычныя творы пачуе ўся спартыўная Еўропа.
Гэтая кніга з'явілася ўсяго месяц таму, на Сусветным фестывалі моладзі і студэнтаў. Ён прайшоў у Сочы. Тады на прэзентацыі Еўрагульняў любы ахвотнік мог пакінуць сваё пажаданне беларускім спартсменам і арганізатарам. Сярод тых, хто падпісаўся, знаходзім імёны Аляксандра Карэліна і Генадзя Зюганава. Ахвотнікаў адправіць беларусам пасланне апынулася так шмат, што старонкі ў кнігу прыйшлося дадаць.
За паўтара года да пачатку Еўрагульняў арганізатарамі ўжо зроблена нямала, трэба яшчэ больш. Аб выкананых мэтах і задачах зараз трэба даць справаздачу. Што і адбудзецца 22-23 лістапада на генеральнай асамблеі Еўрапейскіх алімпійскіх камітэтаў. Гэта будзе першы даклад аб праробленай працы.
Літаральна праз некалькі дзён пасля завяршэння асамблеі, якая стане справаздачна-выбарнай, кіраўніцтва Еўрапейскіх алімпійскіх камітэтаў прыедзе ў Мінск, каб не толькі правесці шэраг сустрэч, але і сваімі вачамі ўбачыць працэс падрыхтоўкі да Еўрагульняў.