Эстафета агню "Полымя міру" напярэдадні пабывала ў Вене і Будапешце

Эстафета агню "Полымя міру" працягвае шэсце па Еўропе. Напярэдадні яна пабывала адразу ў дзвюх еўрапейскіх сталіцах - Вене і Будапешце. Усе дэталі шляху агню ІІ Еўрапейскіх гульняў у Беларусь - у рэпартажы Андрэя Казлова. 

На шляху агню ІІ Еўрапейскіх гульняў ужо нямала цікавага. Эстафета "Полымя міру" ўпэўнена рухаецца па Еўропе ў кірунку роднай краіны. А ў дзень Вялікай Перамогі агонь нашых спаборніцтваў прыбывае ў аўстрыйскую Вену. 

Яго працягвае беражліва ахоўваць каманда беларускіх байкераў, якія і даставяць агонь да Брэста ўжо ў гэту нядзелю. З рук Яўгена Бейзака, факеланосца эстафеты, агонь прымае наша знакамітая скрыпачка Юлія Лебядзенка, якая выступае на самых вядучых сусветных сцэнах. Гэтым разам яна з задавальненнем змяніла сваё амплуа.

На цырымоніі перадачы факела прысутнічалі вядомыя аўстрыйскія спартсмены, у тым ліку гімнастка Ніколь Рупрэхт, пастаянная канкурэнтка беларусак на этапах кубкаў свету. Шэф місіі каманды Аўстрыі Крыстофер Зібер засведчыў, што ў Мінск зборная гэтай краіны прыедзе з сур'ёзнымі медальнымі мэтамі.

Крыстафер Зібер, шэф місіі нацыянальнай каманды Аўстрыі на ІІ Еўрапейскіх гульнях 2019 года: "Гэта сапраўды фантастычны дзень і цудоўны момант - так я магу сказаць без перабольшання. Асабліва мяне здзівілі гэтыя моцныя хлопцы на байках, якія ўжо пераадолелі некалькі тысяч кіламетраў. Я не толькі шчаслівы, што эстафета "Полымя міру" прайшла праз наш горад, але і таму, што ў Мінск я прыеду ў чэрвені ў саставе аўстрыйскай дэлегацыі. І зараз мы займаемся апошнімі прыгатаваннямі, бо нас чакаюць адказныя спаборніцтвы". 

Адна з самых маштабных акцый прайшла ў Будапешце. І відаць, як многа факеланосцаў. Далей агонь рухаецца ў Браціславу. Венгерскі забег ужо запомніўся многім, бо ў маштабным этапе эстафеты "Полымя міру" прымалі ўдзел і спартсмены, і артысты, і палітыкі. Сярод ганаровых факеланосцаў і Мікалай Сігневіч, форвард зборнай Беларусі, які зараз выступае за тытулаваны футбольны клуб "Ферэнцвараш" (Будапешт).

І нават пасля таго, як венгерскі этап завяршыўся, яго ўдзельнікам не хацелася разыходзіцца. Наперадзе - Чэхія, Славакія, Польшча. І далей сустрэча эстафеты дома, у Брэсце.