У Беларусь свой легендарны лонданскі "Чэлсі" прывязе трэнер Маўрыцыа Сары. Вядома, што італьянскі спецыяліст выкурвае каля пяці пачкаў цыгарэт за дзень. Можа, забарона на курэнне на "Барысаў-Арэне" неяк дапаможа нашаму БАТЭ ў супрацьстаянні з сусветным грандам? Хоць, думаецца, наўрад ці. І ўсё вырашыцца, вядома, на полі.
Вынік супрацьстаяння даведаемся 8 лістапада, у гэты дзень адбудзецца матч у Барысаве. А на тыдні БАТЭ даведаўся і пра іншых сапернікаў па групавым раўндзе Лігі Еўропы, жараб'ёўка адбылася ў Швейцарыі. Акрамя лонданскай каманды, чэмпіёны Беларусі будуць змагацца за выхад у плэй-оф з грэчаскім ПАОКам і венгерскім "Відэатонам". Увогуле, футбол сусветнага класа зноў у Беларусі!
Так, няпростая ўвогуле-та група. Матчы 1-га тура пройдуць 20 верасня. У гэты дзень БАТЭ згуляе ў гасцях з венгерцамі. Вядома, Ліга Еўропы не з'яўляецца мяжой летуценняў нашага лепшага клуба: на жаль, у Лігу чэмпіёнаў трапіць не ўдалося. ПСВ (Эйндховен) быў мацнейшым. Таму фінансавы куш у памеры 15 мільёнаў еўра сарвалі галандцы. Нягледзячы на гэта, на цяперашняй еўракубкавай кампаніі барысаўчане ўжо зарабілі 8 мільёнаў еўра.
Але наперадзе як мінімум шэсць матчаў. Расцэнкі за набраныя ачкі таксама вядомыя. У групе Лігі Еўропы за перамогі і нічые плацяць 570 і 190 тысяч еўра адпаведна. А зараз спытаем у галоўнага трэнера БАТЭ Аляксея Багі, ці задаволеныя ў клубе цяперашнім сезонам? Эксклюзіўнае інтэрв'ю ў "Галоўным эфіры".
