Барысаўчане з нецярпеннем чакаюць адкрыцця Барысаў-Арэны

Барысаў рыхтуецца да свята. Праз тры гады пасля закладкі падмурка амаль гатовы новы футбольны стадыён для наймацнейшай каманды краіны - БАТЭ. Гатоўнасць аб'екта - амаль на сто працэнтаў, гавораць будаўнікі. Засталося толькі прызначыць дату адкрыцця Барысаў-Арэны.

Павел Капуцкі ўпэўніўся: жыхары горада могуць ганарыцца не толькі камандай, але і новым стадыёнам.

Барысаў-Арэна - стадыён, які мінімум некалькі найбліжэйшых гадоў будзе найлепшым у Беларусі, будавалі роўна тры гады. Ён атрымаўся арыгінальным, па дызайне нагадвае НЛА, і самае галоўнае - сучасная арэна зараз вельмі патрэбная беларускаму футболу.

Дарэчы, у Піцеры зараз узводзяць новы стадыён для клуба Зеніт. Гэта будзе ўльтрасучасная арэна на 70 тысяч месцаў, дзе праз пяць гадоў пройдуць матчы чэмпіянату свету. Але яна прыкладна ў трыццаць разоў даражэйшая за Барысаў-Арэну. Здаць у эксплуатацыю стадыён Зеніта першапачаткова планавалі ў сакавіку 2009-га, але ён не гатовы дагэтуль.

А вось у Барысаве амаль усё гатова. Калі б вельмі трэба было, тут ужо можна правесці матч. Будаўнічая гатоўнасць аб'екта 99,9%.

У футбол тут яшчэ ніколі не гулялі, але ўнутры вельмі ўтульна. Стадыён пазбаўлены ад бегавых дарожак - гледачы без перашкод змогуць назіраць за гульнёй. А пакуль барысаўчане сочаць за будаўніцтвам. Людзі прыходзяць на арэну, каб палюбавацца, сфатаграфавацца.

Будаўнікі разам з асноўнай працай заадно тэстуюць акустычную сістэму ўнутры стадыёна. Якасцю гуку яны задаволеныя.

А вось хатняя раздзявалка. Адгэтуль гульцы БАТЭ будуць выходзіць на здзяйсненні футбольных подзвігаў, сюды ж будуць вяртацца. Пераможцамі або пераможанымі. Увосень 2008-га ў Мінск прыехалі тысячы піцерскіх фанатаў, каб падтрымаць Зеніт у матчы Лігі чэмпіёнаў супраць БАТЭ. Госці прымудрыліся пранесці на трыбуны стадыёна Дынама піратэхніку, а потым пачалі паліць крэслы.

Беларускія футбольныя балельшчыкі не славяцца буяным норавам, але ў Барысаве, на ўсякі выпадак, усталявалі антывандальныя сядзенні. Іх немагчыма падпаліць і практычна немагчыма выламаць. Вырабленыя гэтыя крэслы, дарэчы, у Гомелі.

Усе месцы для балельшчыкаў знаходзяцца пад дахам. Восем пунктаў для відэаздымкі дазволяць рабіць якасныя тэлетрансляцыі з Барысаў-Арэны. Кожны балельшчык будзе забяспечаны Wi-Fi.

Так стадыён будзе выглядаць увечары, гэта значыць у той час, калі футбол звычайна і праходзіць. Ці захочуць людзі сюды ісці. Адказ на фота.

Дзмітрый Картуз, начальнік БУ-123 ААТ Будтрэст № 3 ордэна Кастрычніцкай рэвалюцыі: Стадыён па ўсіх нормах і патрабаваннях УЕФА адпавядае чацвёртаму ўзроўню. Можна праводзіць усе матчы, акрамя фіналу. Нават паўфіналы можна.

БАТЭ застаецца толькі гуляць і прабівацца ў еўракубкі. Арандаваць стадыёны ў іншых гарадах зараз не прыйдзецца. Фіналы Лігі Еўропы і Лігі чэмпіёнаў усё роўна праводзяцца на нейтральных арэнах.