Балельшчыкі зборнай Беларусі ўжо запасаюцца білетамі на чэмпіянат свету па хакеі, які пройдзе ў Расіі ў наступным годзе. Квіткі ў продажы з пятніцы. Арганізатары абяцалі прытрымлівацца цэнавай палітыкі на ўзроўні мінскага турніру-2014.
Колькі будзе каштаваць падтрымка роднай зборнай, раскажа Канстанцін Прыдыбайла. На гэтым тыдні стартаваў другі этап продажаў білетаў на матчы чэмпіянату свету па хакеі 2016 года, што пройдзе з 6 па 22 мая ў Маскве і Санкт-Пецярбургу. Зборная Беларусі згуляе ў Паўночнай сталіцы Расіі ў групе Б. У саперніках Канада, Фінляндыя, ЗША, Германія, Венгрыя, Францыя і Славакія.
Першы матч наша каманда правядзе 6 мая, а вось балельшчыкам аб білетах трэба ўжо задумацца. Кошт квіткоў абяцалі зрабіць дэмакратычным, за арыенцір узялі турнір у Мінску між іншым.
Пакет білетаў на ўсе гульні беларускай зборнай на дамашнім турніры каштаваў 310 еўра. А каб наведаць усе матчы каманды ў Пецярбургу, давядзецца выкласці прыкладна 370 еўра. Усё ж крыху больш, але не так дорага, як летась у Чэхіі. Там за праход на трыбуны адной гульні прасілі па 50 еўра, прычым гэта сустрэча не топ-каманд.
На гульню расійскай зборнай абанементаў ужо няма. Як паведамляе білетны аператар, за некалькі дзён продажу сышло ўжо 17 тысяч. Што да білетаў квіткоў на канкрэтны матч, то яны стануць даступныя ў красавіку. Арганізатары абяцаюць, што на гульню групавога этапа можна будзе трапіць усяго за суму, роўную прыкладна 500 тысячам беларускіх рублёў. Дарэчы, амаль у 5 разоў даражэй, чым каштаваў самы танны квіток на турніры ў Мінску.
Беларускім балельшчыкам можна набыць абанементы на сайце чэмпіянату. Каб звязаць рукі спекулянтам і пасрэднікам, даюць не больш за шэсць квіткоў у адны рукі, а таксама выпускаюць іх у продаж абмежаванымі партыямі. Такую практыку выкарыстоўвалі і ў 2014-м, калі перыядычна квіткі то з'яўляліся, то знікалі.
Падрыхтоўка ідзе поўным ходам: на днях у Пецярбургу сфарміравалі аператыўны штаб чэмпіянату, прапрацоўваюцца ўзмоцненыя меры бяспекі.
Ну, а што да гульні, то чакаецца, што галоўным новаўвядзеннем стане правядзенне авертаймаў у фармаце тры на тры: ён зараз праходзіць выпрабаванні ў НХЛ і атрымлівае пахвальныя водгукі. Канчаткова гэтае пытанне будзе вырашанае ў сакавіку.
Таксама цікава, што Міжнародная федэрацыя хакея збіраецца змяніць цырымонію ўзнагароджання. На гэта хакейных босаў падштурхнуў скандал, што здарыўся ў фінале леташняга першынства, калі зборная Расіі, прайграўшы, пакінула лёд, не чакаючы выканання гімна Канады, і потым была аштрафаваная. Але пра цырымонію ўзнагароджання, шчыра кажучы, думаць яшчэ рана.
