Гэта сапраўды нашы перамогі. Перамогі краіны, у якой спорту надаецца вялізная ўвага. Беларускі біятлон апошнім часам развіваецца імкліва, і тут відавочна адчуваецца падтрымка дзяржавы. І цяперашнія перамогі - свайго роду дывідэнды гэтай падтрымкі, аддача спартсменаў за дапамогу і ўвагу.
3 залатыя і бронзавы медаль - беларускі біятлон на гэтых гульнях па-за канкурэнцыяй. Адну за гарачыя, адну за зімовыя, адну за твае! 17 лютага на Алімпіядзе ў Сочы быў спачатку паўтораны, а затым і ўстаноўлены рэкорд Алімпійскіх гульняў. Да гэтага часу 3 залатыя медалі ў жаночым біятлоне заваёўвала толькі немка Каці Вільхельм, праўда, для гэтага ёй спатрэбіліся 2 алімпіяды. У панядзелак трохразовай алімпійскай чэмпіёнкай стала Дар'я Домрачава. Для таго, каб удастоіцца такога тытула, ёй спатрэбіўся ўсяго тыдзень.
Далікатная дзяўчына з жалезнай воляй, спартсменка, якая не любіць размаўляць, а даказвае ўсё справай. Выходзячы на любімы мас-старт (за плячамі 2 малыя крыштальныя глобусы ў гэтай дысцыпліне), напярэдадні яна проста хацела перамагчы, каб чарговы раз уславіць краіну - у выніку стала не проста трохразовай алімпійскай чэмпіёнкай. Прэзідэнт краіны Аляксандр Лукашэнка прысвоіў Дар'і званне Герой Беларусі.
І хто можа сказаць, што яна гэтага не заслужыла? Больш яркіх і заканамерных перамог у гісторыі Беларусі не было з часоў Віталя Шчэрбы.
Трэнер Зіберт напярэдадні ледзь не расплакаўся - уся каманда не магла стрымліваць эмоцый. Ды што каманда - уся краіна.
Складана ўявіць, якіх намаганняў каштаваў вывад Домрачавай на пік формы менавіта да Сочы, зразумела адно - за гэтым вынікам стаіць тытанічная праца.
Яна прывучыла Сочы да беларускага гімна, а фірменны танец стаў яе візітнай карткай. Тое, што стварыла тут Домрачава, застанецца ў гісторыі на стагоддзі! Тысячы балельшчыкаў сёння зноў выкрыкнуць: Брава, Дар'я! Цырымонія ўзнагароджання запланаваная на 19.15. Не прапусціце прамую трансляцыю!
