Вечар сёння сапраўды добры. Як і дзень, які прынёс нашай зборнай па лёгкай атлетыцы другі медаль чэмпіянату свету. Прычым узнагароду вышэйшай пробы. У бегу на 800 метраў наша Марына Арзамасава цалкам кантралявала забег і пакінула ззаду ўсіх сваіх саперніц.
Яшчэ ў паўфінале беларуска прадэманстравала высокі вынік, усталяваўшы асабісты рэкорд. Да гэтага трыумфу ў Марыны Арзамасавай ужо быў залаты медаль, праўда, чэмпіянату Еўропы. Склад удзельніц фіналу падабраўся як ніколі моцны. На працягу ўсяго забегу беларуска была сярод лідараў, а за 200 метраў да фінішу вырвалася наперад і, нягледзячы на ўсе старанні саперніц, здолела ўтрымаць сваю перавагу. Хвіліна 58 цэлых і 3 сотыя секунды - час, які дазволіў Марыне Арзамасавай выйграць золата чэмпіянату свету.
Паўтаруся, для зборнай Беларусі на сусветным першынстве па лёгкай атлетыцы ў Пекіне гэта ўзнагарода стала другой у скарбонцы. Напярэдадні званне бронзавага прызёра ў бегу на 100 м з бар'ерамі заваявала Аліна Талай.
З высокімі вынікамі беларускіх спартсменак - Марыну Арзамасаву і Аліну Талай - павіншаваў Прэзідэнт Беларусі Аляксандр Лукашэнка.
"Дарагая Марына! Уся краіна з заміраннем сэрца сачыла за тваім выступленнем на чэмпіянаце свету ў Пекіне.
Ты стала лепшай на планеце, і сёння ўвесь свет апладзіруе твайму поспеху. Дзякуй табе за высокае спартыўнае майстэрства і волю да перамогі. Ты яшчэ раз даказала, што беларуская жанчына - надзейная апора нашага грамадства, краса і гонар нашай Радзімы.
Шчыра жадаю табе, усёй нацыянальнай камандзе па лёгкай атлетыцы моцнага здароўя, шчасця і поспеху".
Таксама віншавальная тэлеграма была накіравана бронзаваму прызёру чэмпіянату свету Аліне Талай.
"Ты проста разумніца! Праз упартыя трэніроўкі і цяжкую працу ты мэтанакіравана ішла да гэтага поспеху. Твой выдатны вынік на чэмпіянаце свету ў Пекіне прынёс вялікую радасць усім беларускім балельшчыкам. Мы ведаем, што ты ставіш перад сабою яшчэ больш амбіцыйныя мэты, і верым у тое, што ты здольна ажыццявіць свае самыя смелыя спартыўныя мары. Жадаю табе шчасця, поспеху і новых перамог", - гаворыцца ў віншаванні.
І зараз у нас ёсць магчымасць у прамым эфіры пагутарыць з наваспечанай чэмпіёнкай свету. На сувязі - Пекін. Марына Арзамасава (відэа).
І прама зараз на прамой сувязі са студыяй старшыня Федэрацыі лёгкай атлетыкі Беларусі Вадзім Дзевятоўскі (відэа).
