Гэтая навіна прылятала да нас з Масквы літаральна некалькі гадзін назад. Тут беларускія тэнісісткі ў стыкавай матчавай сустрэчы за выхад у сусветную групу, г.зн. групу самую элітную, якая складаецца з 8-мі краін, перайграла расіянак. Да гэтага матча зборная Расіі была адной з самых рэйтынгавых каманд гэтай самай эліты, а Беларусь выступала ў Сусветнай групе І, г.зн. другі па рангу, і вось краіны памяняліся месцамі. Нагадаем, расіянкі трапілі ў калатнечу пераходнай стадыі, сенсацыйна прайграўшы галандкам не так даўно. А мы шмат гадоў запар паднімаліся з нізоў... і вось - зорная гадзіна.
Напярэдадні турніру мы крыху перанерваваліся, бо Вікторыя Азаранка, якая набрала фантастычную форму, спачатку заявілася на турнір у Турцыі, ён стартуе ў панядзелак. На шчасце, Віка знялася з гэтых спаборніцтваў, але ў зборную прыехала не з камандай, а крыху пазней. І зноў хваляванні, і зноў чаканні - згуляе або не... Прыехала і згуляла. Ды як!
З яркай перамогай беларускіх тэнісістак павіншаваў Прэзідэнт краіны Аляксандр Лукашэнка.
У "Галоўным эфіры" - Мікалай Стула.
Беларусь - Расія - 3:1. Гэта сапраўды сусветная сенсацыя. Нашы тэнісісткі перамаглі чатырохразовага ўладальніка Кубка Федэрацый, каманду, якая гуляла дома, а, значыць, магла выбіраць найбольш зручнае для сябе пакрыццё. Натуральна, расіянкі выбралі грунт. Лічыцца, што лідар беларускай каманды Вікторыя Азаранка на ім не так пераканаўчая, як, напрыклад на хардзе. Але бліскучая форма Вікі дазваляе не звяртаць увагі на гэтыя хітрасці.
Пяты нумар сусветнага рэйтынгу Віка ўпершыню гуляла супраць расіянкі Маргарыты Гаспаран (47-е месца), і ўпершыню ў гэтым сезоне на грунце. Крыху больш за гадзіну спатрэбілася для перамогі. Бяспройгрышная серыя Азаранкі ў сезоне падоўжылася да 14 паядынкаў.
Гэтай перамогай Азаранка зраўняла лік у суботу, бо Аляксандра Сасновіч не змагла справіцца з Дар'яй Касаткінай. У адсутнасць Марыі Шарапавай зараз яна - нумар адзін расійскага жаночага тэніса. Але лік матча 6:3, 3:6, 6:1 гаворыць пра тое, што была барацьба, што Саша, як кажуць, удосталь "накарміла" саперніцу, якой пасля такой сур'ёзнай нагрузкі ўжо ў нядзелю прыйшлося вытрымаць выпрабаванне самой Азаранкі.
Нядзеля. Матч Азаранка - Касаткіна. Бітва першых нумароў. Вікторыя прыносіць Беларусі другое ачко ў матчы, але для гэтага прыйшлося папрацаваць на мяжы магчымасцяў. Гэтае супрацьстаянне складалася з трох сэтаў. 6:2, 5:7, 6:3. Трыбуны былі супраць Азаранкі, гэта выводзіла яе з сябе, асабліва неабдуманыя выкрыкі са стану расійскай зборнай. Хтосьці выдаваў жаданае за сапраўднае і бачыў неіснуючы аўт пасля ўдараў беларускі.
Але Віка справілася з эмоцыямі. У выніку і нашы ўпершыню павялі ў ліку - агульная перамога знаходзілася на адлегласці выцягнутай рукі.
Азаранка сваю справу зрабіла - зараз мелася даказаць, што ў нас сапраўды тэнісная каманда ўзроўню сусветнай эліты. Саша Сасновіч магла ўсё вырашыць датэрмінова ў паядынку з Гаспаран. І ўпершыню ў матчы больш высокі рэйтынг гульца не меў значэння. Беларуска перамагла, адолела расіянку, якая ў табелі аб рангах Сусветнай тэніснай асацыяцыі стаіць вышэй больш чым на 50 радкоў. Сасновіч у барацьбе аддала першы сэт, затым разбамбіла Гаспаран у другім і літаральна на жылах выцягнула трэці.
Узрушаючая самааддача, бо напярэдадні менавіта беларуска аддала больш сіл. Як апынулася, гэтыя сілы ў яе бязмежныя, калі гаворка ідзе аб найважнейшай перамозе ўсяго беларускага тэніса.
