Ганна Гуськова выйграла золата этапа Кубка свету па фрыстайле ў Маскве

Двайны трыумф беларускіх фрыстайлістаў - і вяртанне алімпійскай чэмпіёнкі Ганны Гуськовай на п'едэстал. Этап Кубка свету ў Маскве, які традыцыйна прайшоў на Вараб'ёвых горах, прынёс нашай зборнай адразу два медалі, адзін з якіх - залаты. 

Увесь мінулы год алімпійская чэмпіёнка Пхёнчхана Ганна Гуськова прапускала - яна аднаўлялася пасля траўм. У гэты раз і ў кваліфікацыі, і ў першым фінале Ганна нязменна набірала трэцюю суму балаў. У вырашальнай бітве за медалі Гуськова выканала трайное сальта. Менавіта скачок такога ўзроўню складанасці ў жаночых спаборніцтвах у гэтым сезоне дазваляе разлічваць на тройку прызёраў. Нягледзячы на жорсткую канкурэнцыю, Ганна справілася. Яе скачок суддзі ацанілі ў самую высокую суму балаў, што дазволіла беларусцы выйграць яе першую ўзнагароду ў гэтым сезоне. 

Павел Дзік узяў бронзу этапа Кубка свету па фрыстайле ў Маскве

Услед за жаночымі скачкамі пачаўся і суперфінал у мужчын. Уся ўвага беларускіх балельшчыкаў тут была прыкаваная да выступлення нашага Паўла Дзіка. У вырашальнай спробе Павел зрабіў стаўку не на складанасць, а на чысціню выканання і не пралічыўся. Суддзі паставілі беларусу ледзь больш як 112 балаў, што дазволіла Дзіку ўпершыню ў кар'еры падняцца на трэцюю прыступку п'едэстала этапа Кубка свету. 

Аляксандра Раманоўская прапусціла этап Кубка свету ў Маскве

Не выступала сёння Аляксандра Раманоўская. Лідар нашай зборнай сёння раніцай падчас размінкі пашкодзіла калена, і трэнерскі штаб прыняў рашэнне паберагчы спартсменку. Нягледзячы на пропуск этапа Кубка свету ў Маскве,  Аляксандра па-ранейшаму з'яўляецца лідарам агульнага заліку ў лыжнай акрабатыцы. Ганна Гуськова пасля сваёй перамогі паднялася на чацвёрты радок. 

Перамогі нашых юніёраў у Букавелі

Працягваюць перамагаць і нашы юніёры, якія выйграюць медалі на кожным этапе Кубка Еўропы. Не стаў выключэннем і ўкраінскі Букавель, дзе сёння беларусы заваявалі адразу тры ўзнагароды, у тым ліку і золата. Пасля бронзы напярэдадні на вышэйшую прыступку п'едэстала паднялася Сняжана Драбянкова. Яе калега па зборнай Ганна Дзяруга стала трэцяй. Бронзавая ўзнагарода дасталася і Андрэю Кузьміну. Дададзім у скарбонку нашай зборнай і трэцяе месца Ігара Драбянкова, якое ён заняў па выніках пятнічных спаборніцтваў. 

Наступны этап Кубка свету па фрыстайле пройдзе ў Раўбічах

Ужо праз тыдзень - 22 лютага - лепшыя лыжныя акрабаты свету збяруцца ў беларускіх Раўбічах, дзе пройдзе чарговы этап Кубка свету. Дарэчы, тут жа шанец выявіць сябе атрымаюць і нашы юніёры. 23 лютага, у нядзелю, стартуе міжнародны турнір па сінхронных скачках.