2 медалі прынёс зборнай Беларусі перадапошні, дзявяты дзень II Еўрапейскіх гульняў. У актыве гаспадароў ужо 61 узнагарода, 22 з якіх вышэйшай пробы, таксама 14 сярэбраных і 25 бронзавых. Напярэдадні на трэцюю прыступку п'едэстала падняўся барэц Саслан Даураў, прадстаўнік грэка-рымскага стылю ў вагавой катэгорыі да 67 кілаграмаў. У схватцы за бронзу беларус нанёс паражэнне ўкраінцу Аляксею Калінічэнку.
Адзначым, што гэты медаль для барцоў стаў пятым. Раней дзве залатыя ўзнагароды зборнай прынеслі жанчыны, два медалі ўзялі і прадстаўнікі вольнага стылю - сярэбраны і бронзавы.
Першы медаль і адразу залаты ў боксе. 23-гадовы Дзмітрый Асанаў стаў не толькі трыумфатарам II Еўрапейскіх гульняў, але і пераможцам чэмпіянату Еўропы. Спаборніцтвы ў гэтым відзе спорту таксама носяць статус першынства кантынента. У вырашальным баі беларус быў мацнейшым за Габіла Мамедава з Расіі.
А адразу пасля цырымоніі ўзнагароджання наваспечаны чэмпіён пабываў у нашай студыі на стадыёне "Дынама". У кампаніі з ім галоўны трэнер каманды Валерый Карнілаў і бацька Сяргей Асанаў - суддзя міжнароднай катэгорыі. Пасля паспяховага выступлення пры родных трыбунах Дзмітрый пачынае падрыхтоўку да чэмпіянату свету. Гэты вераснёвы форум стане ліцэнзійным на Алімпіяду ў Токіа.
Дарэчы, на I Еўрапейскіх гульнях у Баку Асанаў таксама паднімаўся на п'едэстал, але за серабром і ў катэгорыі ніжэйшай - да 56 кілаграмаў. Учарашні трыумф стане гістарычнай для краіны падзеяй. Упершыню за 11 гадоў беларус узяў золата чэмпіянату Еўропы, і, што больш важна, стаў першым на хатніх Еўрапейскіх гульнях.
