Становішча на дзяржграніцы, міграцыйны крызіс і дапамога Беларусі бежанцам. Гэтыя тэмы наш Прэзідэнт сёння абмеркаваў з кіраўніцтвам сілавога блока.
Найважнейшым пытаннем застаецца абарона ўласных граніц. Падстаў для турботы нямала. Мы назіраем актыўныя трэніроўкі прама ля нашых меж. Польшча сцягвае 250 танкаў, набытых у ЗША. Ва Украіне праходзяць вучэнні з удзелам краін НАТА. Фактычна ідзе засваенне стратэгічнага плацдарму сіламі ЗША і НАТА.
Міграцыйны крызіс набірае абароты
Ускладняецца і міграцыйны крызіс. Становішча наўмысна пагаршаецца за кошт дзеянняў пагранведамстваў сумежных краін. Пры гэтым іх кіраўніцтва прамым тэкстам абвінавачвае Беларусь у арганізацыі міграцыйнага крызісу. На чарговай сесіі Генасамблеі ААН рэжымы Польшчы і Літвы сінхронна заявілі, што Беларусь праз штучнае стварэнне і перапаўненне патокаў мігрантаў нібы аказвае палітычны націск на Еўрасаюз. Такі паклёп - жаласная спроба адвесці ўвагу ад абуральных фактаў парушэння праў бежанцаў тымі, хто абяцаў ім ахову. Цкаванне сабакамі, збіванні, пагрозы, а ў даважку яшчэ складаныя ўмовы надвор'я - вось з чым сутыкаюцца людзі, вымушаныя бегчы ў пошуках нібы лепшага жыцця ў Еўропу. Беларускі бок неаднаразова прапаноўваў мігрантам сваю дапамогу. Але яны настойваюць на перамяшчэнні ў краіны, якія іх паклікалі. Тым не менш у Беларусі не могуць застацца абыякавымі да іх лёсу. Пагранічнікі і мясцовыя жыхары працягнуць аказваць усю магчымую дапамогу бежанцам.