Сілавыя структуры - важны фактар нацыянальнай бяспекі, міру і спакою ў дзяржаве. Гэта заявіў Прэзідэнт Беларусі Аляксандр Лукашэнка на сустрэчы з кіруючым складам органаў унутраных спраў, войскаў МУС і курсантамі факультэта. Кіраўнік дзяржавы адзначыў, што цяперашняя сустрэча не выкліканая нейкімі надзвычайнымі акалічнасцямі. Усё праходзіць у планавым парадку. Прэзідэнт заслухаў даклад аб выкананні даручэнняў па ўдасканаленні спецыяльных падраздзяленняў. Гутарка таксама шла пра сацыяльную сферу. У прыватнасці, пра тое, як ідзе забеспячэнне вайскоўцаў жыллём. Падчас наведвання вайсковай часці 3214 унутраных войскаў МУС Кіраўнік дзяржавы азнаёміўся з узорамі ваеннай тэхнікі, формы і экіпіроўкі вайскоўцаў. Аляксандр Лукашэнка падкрэсліў: войны і канфлікты, якія адбываюцца ў свеце, не павінны перасягнуць мяжу Беларусі. Нашай краіне ўдалося самае галоўнае - захаваць кадравае ядро ўсяго сілавога блока ў цэлым.
Падчас выступлення Прэзідэнт падкрэсліў, што па ініцыятыве МУС лакалізаваны шэраг знешніх і ўнутраных выклікаў і пагроз нацыянальнай бяспецы. Прапановы ведамства спрыялі новаму, больш высокаму ўзроўню працы ў барацьбе з наркаманіяй. Але супакойвацца і спыняцца на дасягнутым недапушчальна.
