Сёння Прэзідэнт Аляксандр Лукашэнка правёў нараду, на якой абмеркаваў працу двух буйных прадпрыемстваў легпрама - адкрытых акцыянерных таварыстваў "Камволь" і "Сукно". На "Камволі" з 2013-га ідзе маштабная мадэрнізацыя, якая павінна ператварыць прадпрыемства ў суперсучасны завод. Амаль у 6 разоў павялічацца аб'ёмы вытворчасці. Аднак, паводле інфармацыі кантралюючых органаў, тэрміны мадэрнізацыі зацягваюцца, а кошт будаўніча-мантажных прац павялічваецца. Падрабязнасці - у матэрыяле Аляксея Адашкіна.
Зіма, 2012-ы. Прэзідэнт наведвае сталічны завод "Камволь". Зношанае абсталяванне і няясныя перспектывы. З флагмана легпрама прадпрыемства ператварылася ў стратную і пыльную мануфактуру, якая ледзь зводзіць канцы з канцамі. Прама на заводзе былі прынятыя жорсткія рашэнні - звольненыя кіраўнік прадпрыемства, гендырэктар канцэрна "Беллегпрам" і яго намеснік.
Вясна 2013-га. Аляксандр Лукашэнка зноў на прадпрыемстве легпрама - на Дзяржынскай швейнай фабрыцы. Тут жа абмяркоўваўся і далейшы лёс камвольнай вытворчасці. Уладзімір Сямашка тады прапанаваў частку абсталявання з ААТ "Камволь" перанесці ў ААТ "Сукно" і на прадпрыемства ў Слоніме. А на вызваленых тэрыторыях у Мінску пабудаваць выставачны комплекс. Не выключаўся ўдзел у праекце замежных фундатараў. Прэзідэнт даручыў дэталёва і без паспеху разгледзець такі варыянт. Літаральна праз месяц Прэзідэнт пабываў на ААТ "Сукно". Азнаёміўшыся з сітуацыяй на прадпрыемстве і планамі па мадэрнізацыі, Аляксандр Лукашэнка прыйшоў да высновы, што "Сукно" і "Камволь" павінны ўсё-такі рэалізоўваць асобныя інвестпраекты.
І вось сёння ў Палацы Незалежнасці - гутарка аб складанасцях у лёгкай прамысловасці. У цэнтры ўвагі - адкрытае акцыянернае таварыства "Камволь". У снежні 2012-га Прэзідэнт даручыў скончыць мадэрнізацыю гэтага прадпрыемства менавіта ў 2015-м годзе. Абнаўленне завода ідзе ў асаблівым рэжыме - паралельна вядзецца праектаванне і будаўніцтва. Тым не менш, тэрміны стварэння ўльтрасучаснай вытворчасці на базе былога флагмана зацягваюцца.
На нарадзе - віцэ-прэм'ер, намеснік кіраўніка Адміністрацыі Прэзідэнта, старшыня Камітэта дзяржкантролю, мэр Мінска, кіраўнік канцэрна "Беллегпрам" і кіраўнік самога завода. Усе, хто мае дачыненне да мадэрнізацыі або нясе адказнасць за яе вынік. Кіраўніку дзяржавы далажылі як ідзе рэканструкцыя прадпрыемства. У адпаведнасці з Указам Прэзідэнта № 510 інвестпраект па стварэнні новай вытворчасці павінен быць рэалізаваны да канца 2015 года. Пры гэтым выхад на праектную магутнасць запланаваны толькі ў пачатку 2017-га. Завершаныя два з чатырох этапаў мадэрнізацыі. У канцы верасня чакаецца заканчэнне трэцяга.
Патрабаванне Прэзідэнта - не толькі захаваць працоўныя месцы, але і забяспечыць канкурэнтаздольнасць прадпрыемства ў будучыні. А гэта магчыма толькі пры выпуску якаснай і запатрабаванай прадукцыі. Толькі так атрымаецца павысіць рэнтабельнасць, вярнуць інвеставаныя дзяржавай сродкі і пачаць зарабляць. У гэтым месяцы Еўразійская эканамічная камісія адмяніла абмежаванні для доступу беларускай камвольнай тканіны на расійскі рынак. Паводле разлікаў экспертаў, у Расіі толькі запатрабаванне сілавых структур у тканіне ацэньваецца ў 10 мільёнаў долараў. А ёсць і іншыя кірункі для экспарту.
Важна, што і ўнутраны рынак з запускам абноўленага "Камволя" атрымае якасныя і канкурэнтныя па кошце тканіны. Асобны кірунак - матэрыялы для школьнай формы, разнастайнасць якіх павялічыцца. Пры гэтым Прэзідэнт на нарадзе асабліва падкрэсліў неабходнасць абароны айчыннага рынку ад імпартных аналагаў. Што датычыцца ідэі стварэння адзінага камвольна-суконнага прадпрыемства, то сёння Прэзідэнт не падтрымаў такую ідэю. Гэтае пытанне плануюць абмяркоўваць толькі пасля завяршэння мадэрнізацыі "Камволя". Ужо ў верасні Аляксандр Лукашэнка збіраецца наведаць гэтае прадпрыемства і асабіста пракантраляваць, як завяршаецца абнаўленне завода.
Наталля Скіба ўжо 40 гадоў працуе на гэтым прадпрыемстве. Пачынала яшчэ на старых станках, дзе ўсё рабілася ўручную. Новае абсталяванне, якое зараз усталёўваюць, не спыняючы вытворчасці, майстар актыўна асвойвае. Умовы працы на "Камволі" паляпшаюцца. Зараз супрацоўнікі чакаюць і фінансавай аддачы. Разлік на тое, што мадэрнізацыя павялічыць продажы і такім чынам адаб'ецца на зарплатах і ткачых, і менеджараў завода.
