Прэзідэнт адкрыў мемарыял памяці спаленых вёсак Магілёўскай вобласці

Галоўная задача ўсіх нас - абараніць краіну. Такую заяву зрабіў сёння Прэзідэнт Аляксандр Лукашэнка, прымаючы ўдзел у адкрыцці мемарыяла памяці спаленых вёсак Магілёўскай вобласці. Комплекс размешчаны ў вёсцы Боркі. Яе трагедыя - частка гістарычнай памяці народа Беларусі. 78 гадоў таму падчас адной з самых буйных карных аперацый за адзін дзень нацысты расстралялі і спалілі больш як 2 тысячы мірных жыхароў. Гэтыя падзеі леглі ў аснову адной з сюжэтных ліній самага пранізлівага фільма аб лёсе мірнага насельніцтва ў гады Вялікай Айчыннай "Ідзі і глядзі".

У памяць аб жыхарах вёскі Боркі і спаленых вёсках вобласці  ў савецкі час быў усталяваны помнік-скульптура воіну і дзяўчыне. А ў 2004-м збудаваная капліца ў гонар абраза Божай Маці "Спагнанне загінуўшых". Ледзь пазней усталявалі сцяну памяці спаленых вёсак. Летась было вырашана рэканструяваць памятныя знакі і стварыць тут мемарыял, які раскрывае і паказвае ў поўнай меры ўсе зверствы нацызму. Прэзідэнт агледзеў аб'екты комплексу, а таксама пагутарыў з людзьмі.