Цяганіна і няўменне працаваць з інвестарамі пры будаўніцтве важных аб'ектаў. Сёння Прэзідэнт Беларусі Аляксандр Лукашэнка раскрытыкаваў мінскія ўлады. Сваю незадаволенасць Кіраўнік дзяржавы выказаў на нарадзе па пытанні выканання даручэнняў аб узвядзенні значных аб'ектаў у Мінску. Сталіца - гэта твар нашай краіны, але менавіта тут часцей за ўсё ўзнікаюць праблемы, звязаныя з нізкімі тэмпамі будаўніцтва і дрэннай якасцю работ. І ў гэтым вінаватыя не толькі праекціроўшчыкі і самі будаўнікі. У першую чаргу, гэты недагляд службовых асоб, якія арганізуюць працэс, такім чынам, павінны несці поўную адказнасць за ход рэалізацыі праектаў.
Аляксандр Лукашэнка пацікавіўся таксама сітуацыяй па астатніх аб'ектах, якія будуюцца, мерамі, запланаванымі для іх паспяховай рэалізацыі і тым, што зроблена сумесна з урадам для бесперабойнага фінансавання. Кіраўнік дзяржавы таксама даручыў на працягу 2 месяцаў правесці конкурс праектаў па будаўніцтве самага праблемнага аб'екта Мінск-Сіці, а таксама выпрацаваць умовы, на якіх сюды будуць прыцягнуты інвестары. Падрабязнасці сённяшняй нарады ў Кіраўніка дзяржавы - на інфармацыйным канале Панарама.
