Акрамя цяжкіх партфеляў і пакетаў са зменным абуткам, сёння сотні тысяч беларускіх школьнікаў прыйшлі ў класы з яркімі букетамі. Ужо паслязаўтра - Дзень настаўніка, але па даўняй традыцыі адзначаць яго пачынаюць яшчэ напярэдадні. Сёння ж, праўда, на больш высокім узроўні правялі мерапрыемства, якое таксама ўжо даўно традыцыя. З фіналістамі конкурсу Настаўнік года сустрэўся Кіраўнік дзяржавы. Ён асабіста павіншаваў пераможцу Віктара Жука і ўручыў яму Хрустальнага жураўля і ключы ад аўтамабіля. Зрэшты, гаварылі на гэтай сустрэчы не толькі пра справы школьныя. Па-першае, педагог - гэта не проста прафесія, гэта асаблівая місія. А па-другое, сам Аляксандр Лукашэнка і былы настаўнік, і бацька, які пра школьныя справы і праблемы ведае не па чутках. Так што тэмы гучалі розныя.
Рэпартаж Дар'і Белавусавай-Пятроўскай. У гэтым класе ўрокі гісторыі не прагульваюць. Бо дэвіз маладога настаўніка - Урок не павінен быць сумным! Незалежна ад узросту вучняў і тэмы. Складаны матэрыял Віктар Жук тлумачыць на простых прыкладах і праз тэатралізаваныя пастаноўкі, у якіх удзельнічаюць самі школьнікі. Так яны лепш запамінаюць гістарычныя тэрміны і даты. Таму адказваць на пытанні настаўніка тут не баяцца.
Нягледзячы на тое што выкладчыцкі стаж усяго тры гады, Віктар Жук стаў лепшым з 30-ці тысяч удзельнікаў конкурсу Настаўнік года. А пасля заканчэння школы па патрабаванні бацькоў паступіў у будаўнічы ліцэй. Пяць гадоў адпрацаваў маляром-тынкоўшчыкам. Але любоў да гісторыі не прайшла. І паралельна ён вучыўся на завочным аддзяленні педагагічнага ўніверсітэта імя Максіма Танка, на факультэце гісторыі. Вярнуўся выкладаць любімы прадмет у родную школу ў Маладзечне.
І сёння за сваю працу і ўменне знаходзіць падыход да любога дзіцяці Хрустальнага жураўля і ключы ад аўтамабіля Віктар Жук атрымаў асабіста з рук Прэзідэнта краіны.
Конкурс Настаўнік года ў Беларусі праводзяць ужо больш як 20 гадоў. Яго мэта - не толькі выбраць лепшых педагогаў, але і ўкараняць іх метады навучання ў сістэму адукацыі. Сёлета конкурс прайшоў у новым фармаце. Упершыню ўвялі намінацыі па прадметах. Таму пераможца па традыцыі адзін, затое 20 лаўрэатаў.
Гэта выкладчыкі розных прадметаў: фізікі, біялогіі, інфарматыкі, фізкультуры і выяўленчага мастацтва. Некаторыя - прадстаўнікі цэлых дынастый. Так, у настаўніка біялогіі Марыны Юр'евай з 5-й гімназіі Віцебска ў школе выкладалі практычна ўсе сваякі. Бацькі - хімікі-біёлагі, бабуля - настаўнік матэматыкі, цётка - рускай мовы.
Наваполацк, Ашмяны, Магілёў, Віцебск, Глыбокае, Дзяржынск - сярод лаўрэатаў толькі адзін настаўнік з Мінска. Па словах Аляксандра Лукашэнкі, гэта добры прыклад, што сярод лепшых не толькі настаўнікі сталічных школ.
На сустрэчы Кіраўнік дзяржавы не абмінуў увагай праблемныя пытанні сістэмы адукацыі. Гэта ўзаемаадносіны школы і сям'і, змест і складанасць сучасных школьных праграм, якасць падручнікаў.
Таксама Аляксандр Лукашэнка не задаволены, як ідзе моўная падрыхтоўка вучняў. Па словах Кіраўніка дзяржавы, замежную мову трэба вывучаць абавязкова, але пры гэтым нельга забывацца пра родную.
На сустрэчы Прэзідэнт Беларусі адзначыў, што пры такой загружанасці вучняў у школе неабходна, каб дзеці былі часцей на свежым паветры і займаліся спортам. Для гэтага Аляксандр Лукашэнка прапанаваў увесці шосты школьны дзень. Але, на жаль, гэтая ідэя пакуль не карыстаецца вялікай папулярнасцю.
Падчас зносінаў з настаўнікамі Кіраўнік дзяржавы падкрэсліў, што размова не ідзе пра карэнную ломку ці новую рэформу ў сістэме адукацыі. Каб вучоба была на радасць і вучням, і настаўнікам, праблемныя пытанні неабходна дашліфаваць. І ў гэтай рабоце трэба задзейнічаць лепшых педагогаў Беларусі, у тым ліку і пераможцаў конкурсу Настаўнік года. Менавіта яны з іх вопытам і інавацыйнымі ідэямі змогуць стаць незалежнымі экспертамі і зрабіць сістэму адукацыі краіны лепшай.
