АДКБ трэба падняць і зрабіць моцнай арганізацыяй, але пры гэтым нікому не пагражаючы. Аб гэтым Прэзідэнт Беларусі заявіў на сустрэчы з генеральным сакратаром гэтай структуры.
Пытанні гарантавання бяспекі і міжнароднае становішча сталі цэнтральным прадметам абмеркавання ў Палацы Незалежнасці. Кіраўнік дзяржавы канстатаваў: у свеце складаецца напружаная сітуацыя. Перад краінамі АДКБ з'яўляюцца ўсе новыя выклікі і пагрозы - як унутры блока, так і ля меж аб'яднання. Як рэагаваць і якія неабходны крокі - ключавыя пытанні. Бо бяспека ў рэгіёне адлюстроўваецца і на эканоміцы. Акрамя таго, Аляксандр Лукашэнка і Мікалай Бардзюжа абмеркавалі праекты дакументаў, якія прадставяць на зацвярджэнне прэзідэнтаў падчас саміту АДКБ у сярэдзіне кастрычніка ў Ерэване. Асноўны з іх - стратэгія калектыўнай бяспекі да 2025-га года. Да ерэванскага саміту наша краіна рыхтуе маштабную праграму ініцыятыў. Ідзе сур'ёзная падрыхтоўка, бо статус старшыні ў арганізацыі ад Арменіі пяройдзе Беларусі. Афіцыйны Мінск чарговы раз агучвае сваю пазіцыю: для супрацьстаяння любым негатыўным сцэнарыям ужо зроблена шмат, але ваенны патэнцыял АДКБ яшчэ трэба будзе ўмацаваць.
Сёння ў ваенна-палітычны саюз уваходзяць Беларусь, Расія, Казахстан, Арменія, Таджыкістан і Кыргызстан. Сустрэчы лідараў дзяржаў - удзельнікаў АДКБ у канцы мінулага года адбыліся двойчы: спачатку ў кастрычніку (у Душанбэ) і ў снежні (у Маскве). Тады прэзідэнты падпісалі сумесную заяву аб процідзеянні міжнароднаму тэрарызму.
А ў пачатку лютага ўжо ў Мінску прайшло пасяджэнне Кардынацыйнага савета кіраўнікоў кампетэнтных органаў дзяржаў арганізацыі. Тады абмяркоўвалі барацьбу з незаконнай міграцыяй.
Зрэшты, беларускія міратворцы з калегамі па АДКБ пастаянна адпрацоўваюць дзеянні для супрацьстаяння любым негатыўным сцэнарыям. Адны з апошніх вучэнняў - "Непарушнае брацтва - 2016" - у канцы жніўня на беларускім палігоне Абуз-Лясноўскі. Сярод буйных праектаў, над якім сёння працуюць у АДКБ - Цэнтр крызіснага рэагавання. Яго створаць на базе Мінабароны Расіі.
