Пра гэта заявіў дзеючы старшыня АБСЕ, першы намеснік прэм'ер-міністра - міністр замежных спраў Сербіі. Івіцу Дачыча сёння прыняў Прэзідэнт Аляксандр Лукашэнка. Пра дээскалацыю канфлікту ва Украіне гаварылі ў Палацы Незалежнасці. Кіраўнік дзяржавы лічыць недастатковай ролю АБСЕ ва ўрэгуляванні ўкраінскага крызісу і ўскладае частку віны за гэта на лідараў дзяржаў, якія ўваходзяць у гэту арганізацыю. Аляксандр Лукашэнка прызнаўся, што яго стаўленне да АБСЕ - дваістае. Ролю арганізацыі па бяспецы і супрацоўніцтве ў Еўропе варта ўзмацніць, таму Беларусь за комплекснае рэфармаванне арганізацыі.
Івіца Дачыч, дзеючы старшыня АБСЕ, першы намеснік прэм'ер-міністра - міністр замежных спраў Сербіі: "Мінск стаў сінонімам мірнага ўрэгулявання крызісу ва Украіне. Тут, у Мінску, дасягаюцца шматлікія дамоўленасці, пагадненні, сустракаюцца трохбаковая кантактная група і яе рабочыя падгрупы. І ў гэтай сувязі Беларусь зрабіла вялізны ўнёсак у мірны працэс. Сербія, з'яўляючыся дзеючым старшынёй АБСЕ, імкнецца максімальна прыкласці намаганні, каб палітычны працэс развіваўся, асабліва ў пытаннях, звязаных з Украінай".
Сербія - ключавы партнёр Беларусі на Балканах і займае адмысловае становішча ў знешняй палітыцы нашай краіны. Зона свабоднага гандлю паміж Беларуссю і Сербіяй дазволіла ў чатыры разы павялічыць тавараабарот - прыкладна да 200 мільёнаў долараў. Мэта - нарасціць узаемны гандаль да паўмільярда долараў.
