Прэзідэнт Аляксандр Лукашэнка падчас рабочага візіту ў Аб'яднаныя Арабскія Эміраты правёў перамовы са Спадчынным прынцам Абу-Дабі, намеснікам Вярхоўнага галоўнакамандуючага шэйхам Мухамедам бен Заідам аль-Нахаянам.
Лідары канстатавалі рост тавараабароту паміж краінамі, у першую чаргу беларускага экспарту. Сустрэча была працяглай і доўжылася каля дзвюх гадзін. Бакі абмеркавалі стратэгічнае інвеставанне і сумесныя праекты ў лагістыцы, геалагічнай разведцы, высокіх тэхналогіях і космасе. У прыватнасці, пастаўкі найноўшага мадэльнага шэрагу МЗКЦ і ўдзел Беларусі ў аэракасмічнай праграме Арабскіх Эміратаў. Зацікаўленыя ў Абу-Дабі і ў выкарыстанні выгаднага геаграфічнага становішча Беларусі і нашага ўдзелу ў Еўразійскім эканамічным саюзе. На сустрэчы пацвердзіўся намер стварыць пад Оршай буйны мультымадальны лагістычны цэнтр з арабскімі інвестыцыямі і тэхналогіямі кіравання.
Раман Галоўчанка, Надзвычайны і Паўнамоцны Пасол Беларусі ў ААЭ і Катары па сумяшчальніцтве:
"Беларусь прыцягвае Эміраты сваім патэнцыялам як транспартнага і лагістычнага хаба. Асабліва, улічваючы той патэнцыял, які ёсць у Эміратаў. У спісе, пэўна, пяці найбуйнейшых лагістычных кампаній свету Эміраты займаюць два радкі як мінімум. Натуральна яны глядзяць на геастановішча Беларусі, ужо аднаго погляду на карту досыць, каб зразумець, які эфект могуць прынесці стварэнне буйнамаштабных лагістычных магутнасцяў на тэрыторыі Беларусі пры перавалцы гандлёвых патокаў паміж Еўропай і Азіяй, у тым ліку ў кантэксце новага Шаўковага шляху. Дастаўка сухапутным шляхам грузаў з Кітая ў Еўропу і назад".
Праект транспартна-лагістычнага хаба падрабязней абмяркуюць сёння ў эміраце Дубай. Акрамя таго, перад урадамі дзвюх краін пастаўлена задача да планаванага ў наступным годзе візіту Спадчыннага прынца Абу-Дабі ў Беларусь дакладна прапрацаваць і падрыхтаваць для зацвярджэння 3-4 праекты ў перспектыўных сферах.
