Пачнем мы з тэмы, якая стала самай гучнай на гэтым тыдні. Напярэдадні рабочая паездка Прэзідэнта ў Мінскую вобласць павярнулася цэлым шэрагам адставак. Па выніках наведвання прадпрыемства Барысаўдрэў Аляксандр Лукашэнка падпісаў указ, паводле якога за неналежнае выкананне даручэнняў Прэзідэнта па мадэрнізацыі вытворчасці Барысаўдрэў ад пасады вызваленыя губернатар Мінскай вобласці Барыс Батура, старшыня канцэрна Беллеспаперпрам Аляксандр Пераслаўцаў, строгая вымова аб'яўленая старшыні Барысаўскага райвыканкама Уладзіміру Мірановічу.
Таксама за адсутнасць належнага кантролю за ходам мадэрнізацыі аб'ектаў Барысаўдрэва, неналежную падрыхтоўку мерапрыемства з удзелам Прэзідэнта вызвалены ад пасады намеснік кіраўніка прэзідэнцкай адміністрацыі Андрэй Тур. Строгая вымова аб'яўленая Кіраўніку Адміністрацыі Прэзідэнта Андрэю Кабякову і Старшыні Камітэта дзяржкантролю Аляксандру Якабсону.
Міністэрству архітэктуры і будаўніцтва, Мінскаму аблвыканкаму дадзеныя даручэнні аб вызваленні ад занятых пасад кіраўнікоў арганізацый, якія ўдзельнічалі ў праектаванні і будаўніцтве аб'ектаў Барысаўдрэва: гэта гендырэктар ААТ Будтрэст № 21 Мікалай Бусалаў, дырэктар Інстытута Барысаўпраект Аляксандр Місіюк. Дарэчы, узначаліць ААТ Будтрэст № 21 ужо былы старшыня канцэрна Беллеспаперпрам Аляксандр Пераслаўцаў.
Генпракуратуры, дзяржкантролю і МУС даручана ўзбудзіць крымінальныя справы па фактах парушэнняў, дапушчаных падчас праектавання і будаўніцтва аб'ектаў Барысаўдрэва, па фактах безгаспадарлівасці, а таксама забяспечыць прыцягненне да адказнасці віноўных службовых асоб.
Прэм'ер-міністру Міхаілу Мясніковічу неабходна да 10 снежня падрыхтаваць даклад аб ходзе выканання ўсіх рашэнняў Кіраўніка дзяржавы па мадэрнізацыі прадпрыемстваў дрэваапрацоўчай прамысловасці, а Адміністрацыі Прэзідэнта Беларусі па выніках дадзенага даклада ўнесці прапановы аб адпаведнасці занятай пасадзе першага віцэ-прэм'ера Уладзіміра Сямашкі. Акрамя таго, дзяржкантролю даручана стварыць спецыяльную працоўную групу па праверцы выканання праграмы мадэрнізацыі ў галіне па аналогіі з той, што працуе зараз у будаўніцтве. Вынікі павінны быць прадстаўленыя Прэзідэнту да 1 снежня.
Персанальная адказнасць за далейшае выкананне праграмы мадэрнізацыі ўскладзеная на губернатараў, кіраўнікоў канцэрна Беллеспаперпрам і ўсіх профільных прадпрыемстваў. Пры гэтым працы па комплекснай мадэрнізацыі аб'ектаў Барысаўдрэва павінны быць завершаныя да 1 чэрвеня 2014 года.
