Кіраўнік дзяржавы прыняў кадравыя рашэнні па ключавых фігурах у сістэме нацыянальнай бяспекі

Размова пра новага Дзяржсакратара Савета бяспекі - ім стаў Андрэй Раўкоў, і пра кіраўніцтва Міністэрства абароны. Усё лагічна. Міністр пайшоў на павышэнне, але ваеннае ведамства без кіраўніка  не павінна застацца. Яго з гэтага часу ўзначальвае Віктар Хрэнін. Чалавек у арміі не новы. Раней быў камандуючы войскамі Заходняга аператыўнага камандавання. Кіраўніком Генеральнага штаба Узброеных сіл прызначаны Аляксандр Вальфовіч. Прызначаючы топавых фігур у ваеннай сферы, Прэзідэнт зрабіў важныя акцэнты. Якія? Спытаем у нашага аглядальніка Наталлі Брэвус. 

Аб тым, што будуць кадравыя перастаноўкі, гаварылі-абмяркоўвалі ўжо мінімум з паўгода. Многія версіі пачалі з’яўляцца амаль адразу пасля таго, як стала вядома, што ранейшы Дзяржсакратар Савета бяспекі Станіслаў Зась прасунецца па міжнароднай лініі. Гэты год наогул для Беларусі вельмі адказны і напружаны ў плане працы ў інтэграцыйных структурах. Памятаем ЕАЭС - там у еўразійскай камісіі Міхаіл Мясніковіч,  і АДКБ - генсак арганізацыі наш Зась. Сам Прэзідэнт распавёў, што думаў над гэтымі кадравымі рашэннямі не адзін месяц. Але ў тым, што і для Савета бяспекі, і для Мінабароны ўсё, як гаворыцца, зроблена адным махам, ёсць сэнс. Гэта стала зразумела сёння на кадрах. 

Галоўнакамандуючы катэгарычны - у людзей у пагонах усё павінна быць дакладна

Дакладны, вопытны, адукаваны - менавіта так гавораць пра Раўкова. Гэтыя якасці будуць дарэчы і ў Дзяржсакратарыяце, які, па сутнасці, дапамагае Прэзідэнту ў працы з сілавым блокам. Улічваючы, што менавіта армія ядро гэтага блока - логіка першай асобы зразумелая. Хоць, як зазначыў Прэзідэнт, ідэальных кандыдатур няма, але пазітыўныя якасці афіцэраў, сярод іх прафесіяналізм, выдатная падрыхтоўка, адданасць радзіме, урэшце пераважылі. 

52-гадовы Андрэй Раўкоў ва Узброеных сілах з 1984 года. Дарэчы, суворавец, усе ўстановы адукацыі заканчваў з адзнакай, што таксама лішні раз гаворыць пра настойлівасць і характар. Апошнія 5 гадоў узначальваў Мінабароны. Апроч іншага пры ім ішло актыўнае пераўзбраенне, сталі неяк больш чутка рэагаваць на павевы часу. Як вы памятаеце, у арміі была створана IT-рота. І сталі больш адкрыта рэагаваць на тое, што выклікае пытанні ў грамадства і  журналістаў. А сёння прэсе ён так і сказаў: "Я свой". Так што доўга ўнікаць не прыйдзецца. 

Калі крыху спрашчаючы сказаць аб тым, якая задача пастаўлена Прэзідэнтам, то гучыць гэта так:  усе структуры сілавога блока павінны разумець адна адну,  калі хочаце,  нават без слоў і працаваць зладжана як гадзіннікі на бяспеку краіны. На справе  гэта вельмі няпроста. Як гаворыцца,  вопыт у дапамогу. 

Прыняцце ж рашэнняў па кіраўніках Мінабароны і Генштаба - гэта, па сутнасці, мазгавы цэнтр Узброеных сіл - укладваецца ў шматгадовую логіку Прэзідэнта: "не ламаць, а ўдасканальваць". Стаўка на пераемнасць, на прафесіяналаў сваёй справы і тых, хто адчуў гэтую службу знутры. 

Віктар Хрэнін стаў міністрам абароны

Некалькі  слоў пра гэтых афіцэраў. Новы міністр абароны - 48-гадовы генерал Віктар Хрэнін. Сам з Навагрудка. Папярэднія паўтара дзясятка гадоў яго служба была звязана з войскамі Заходняга аператыўнага камандавання. Апошнія 5 гадоў займаў там пасаду камандуючага войскамі. Цікава, што дзед генерала вызваляў Магілёў, бацька  таксама вайсковец. Пра Хрэніна гавораць: на пасадзе камандзіра ўнікаў ва ўсе дэталі, дэманстраваў справядлівае стаўленне да людзей і, што важна,  шашкай не махае. Мяркуючы па першых заявах,  так і ёсць. 

Віктар Хрэнін, Міністр абароны Беларусі: "У першую чаргу -  праца з людзьмі. У грамадстве ёсць вялікі запыт на справядлівасць і сумленнасць.  Асноўнае - гэта людзі, захаванне кадравага патэнцыялу, навучанне асабовага складу таму, што неабходна на вайне. Таксама стаіць задача ўтрымання і эксплуатацыі наяўнай на ўзбраенні тэхнікі, яна павінна быць гатовая да прымянення. Калі ў нас будуць гатовыя людзі і будзе тэхніка, то нам ніякая пагроза не страшная. Таму на гэтых двух кірунках і будзе засяроджана асноўная ўвага".

Мабільная, падрыхтаваная і ўзброеная армія - вось што нам трэба. Здольная нанесці,  калі што,  той самы непрымальны ўрон праціўніку. На гэта накіравана праца Узброеных сіл апошнім часам, на гэта арыентуе Галоўнакамандуючы. І вядома, праца ўсяго абароннага ведамства залежыць у тым ліку і ад таго, як спрацуе Генштаб. Яго новы начальнік - з дынастыі вайскоўцаў. Актыўна ўдзельнічаў у распрацоўцы плана абароны і канцэпцыі будаўніцтва і развіцця Узброеных сіл на найбліжэйшае дзесяцігоддзе. На першы план ставіць падыход без фармалізму. 

Эксперты называюць гэтыя кадравыя рашэнні Прэзідэнта, па-першае, чаканымі. Як мы памятаем, Зась на пазіцыі Генеральнага сакратара АДКБ са студзеня і цягнуць далей было нельга. Па-другое, аналітыкі сыходзяцца ў меркаванні, што гэта тыя крокі, якія накіраваны на ўмацаванне сістэмы бяспекі. Выхадзец з Узброеных сіл, вопытны армейскі генерал здольны забяспечыць неабходны баланс у сілавым блоку. Для вайскоўцаў новыя кіраўнікі  таксама не сенсацыя. Прайшоўшы такі шлях і паказаўшы сябе ў справе,  можна смела прэтэндаваць на міністэрскую пасаду.