Тысяча выкладчыкаў з усёй краіны: у Мінску сёння прайшоў найбуйнейшы адукацыйны форум - вялікі Рэспубліканскі педсавет з удзелам Кіраўніка дзяржавы.
Як падкрэсліў Прэзідэнт, у эпоху найноўшых тэхналогій роля педагога змянілася кардынальна. Звяртаючыся да прысутных, Аляксандр Лукашэнка асобна адзначыў, што для сучаснай эканомікі ведаў найважнейшым рэсурсам з'яўляюцца прарыўныя тэхналогіі. І ў такіх умовах галоўную ролю адыгрывае адукацыя. Беларусь таксама павінна адпавядаць гэтым тэндэнцыям. У першую чаргу гэта тычыцца менавіта педагогаў, якія на першым, найбольш адказным этапе фарміруюць кадравы патэнцыял краіны.
Задача педагога - даць маладым людзям арыенціры, якія выхаваюць сапраўднага грамадзяніна і патрыёта. Важная роля ў гэтым працэсе адводзіцца пазакласнай працы і шостаму школьнаму дню. На думку Прэзідэнта, у гэтым кірунку зрабіць трэба яшчэ шмат.
Рэспубліканскі педсавет з удзелам Кіраўніка дзяржавы працягваўся тры з паловай гадзіны. Педагогі змаглі задаць і свае пытанні Прэзідэнту: спецыяльна для гэтага быў прадугледжаны фармат адкрытага мікрафона. Спецыялістаў цікавілі тэмы профільнай арыентацыі ВНУ, іх прывабнасць для замежных студэнтаў, а таксама інфармацыйная бяспека.
Рэспубліканскі педсавет - традыцыйная форма працы напярэдадні новага навучальнага года. Эксперты два дні абмяркоўвалі канцэптуальныя падыходы да развіцця сістэмы адукацыі. У Кодэксе аб адукацыі ўжо закладзены заканадаўчы калідор для асноўнай навацыі - пераходу на абавязковую ўсеагульную сярэднюю адукацыю. Спецыялісты ўпэўнены, што такі крок будзе гарантам паспяховай сацыялізацыі беларускай моладзі.
Дзяніс Капскі, дэкан трактарнага факультэта БДТУ:
"Якасць завочнага навучання павінна адпавядаць дзённаму навучанню, таму што не падзяляюцца дыпломы, а якасць трэба забяспечваць, таму што кожны ўніверсітэт - гэта ўласны брэнд, гэта ўласны ўзровень дыплома, што вылучае той або іншы ўніверсітэт і кваліфікацыі. Дубліраванне спецыяльнасцяў, гэта, вядома, трэба ліквідаваць, таму што, як і сказаў Кіраўнік дзяржавы, фінансаванне небязмежнае і неабходна аптымізаваць".
Усе прапановы, выказаныя і падчас адкрытага мікрафона, і накіраваныя ў найбліжэйшы час у Міністэрства адукацыі ад педагогаў школ, каледжаў і ўніверсітэтаў, будуць прааналізаваны. Самыя аргументаваныя знойдуць адлюстраванне ў дарожнай карце развіцця беларускай сістэмы адукацыі да 2020 і 30-х гадоў.
