Беларусь цалкам падтрымлівае ініцыятывы Сусветнай арганізацыі аховы здароўя і прыкладае максімум намаганняў для іх рэалізацыі. Пра гэта заявіў Прэзідэнт Аляксандр Лукашэнка на еўрапейскай канферэнцыі СААЗ. Яна адкрылася ў Мінску сёння і сабрала дзве сотні спецыялістаў з 53 краін. Практычна нулявы ўзровень дзіцячай і мацярынскай смяротнасцяў, добрыя паказчыкі імунізацыі ў дзіцячым узросце сталі ключавымі фактарамі, па якіх месцам правядзення канферэнцыі выбрана менавіта беларуская сталіца. Мэта форуму - ажыццявіць новую палітыку "Здароўе-2020". Гэта маштабны план дзеянняў, які, у тым ліку, накіраваны на папярэджанне і прафілактыку неінфекцыйных захворванняў. І як адзначыў Аляксандр Лукашэнка, перад еўрапейскімі краінамі сёння стаяць адны і тыя ж праблемы. Каб справіцца з імі, трэба аб'ядноўвацца і змагацца з захворваннямі разам. Чым прывабны беларускі вопыт для еўрапейскіх медыкаў, што мадэль працы Міністэрства аховы здароўя можа запазычыць з сусветнай практыкі?
Пра дыялог бакоў - рэпартаж Аляксея Адашкіна. Сусветная арганізацыя аховы здароўя - гэта адно з самых актыўных і важных агенцтваў ААН. Дадзенае падраздзяленне займаецца прыкладнымі і глабальнымі праблемамі ў сферы медыцыны. СААЗ распрацоўвае стандарты і нормы, аказвае тэхнічную дапамогу, а таксама трымае пад кантролем стан здароўя ва ўсіх кутках нашай планеты. Напрыклад, барацьба са страшным вірусам Эбола вядзецца менавіта пры садзейнічанні Сусветнай арганізацыі аховы здароўя. Еўрапейскі дэпартамент СААЗ - адно з шасці рэгіянальных аддзяленняў арганізацыі. У яго склад уваходзіць 53 дзяржавы, уключаючы і Беларусь. У Мінску краінавае бюро СААЗ было адкрыта ў 1994 годзе. Спецыялісты філіяла кансультуюць і аказваюць тэхнічную дапамогу Міністэрству аховы здароўя. Праекты, рэалізаваныя ў нашай краіне, уключаюць у сябе інавацыі ў барацьбе з такімі захворваннямі, як сухоты, ВІЧ і розныя віды раку. Акрамя таго, менавіта пры садзейнічанні экспертаў СААЗ была распрацавана канцэпцыя і праведзены вольны ад курэння чэмпіянат свету па хакеі.
Еўрапейскае бюро СААЗ узначальвае ўраджэнка Венгрыі Жужанна Якаб. Гэту пасаду яна займае з 2010 года. У гэтым студзені была перавыбрана на другі тэрмін. Да пачатку прадстаўнічай канферэнцыі Сусветнай арганізацыі аховы здароўя ў Мінску спадарыня Якаб сустрэлася з Прэзідэнтам Беларусі. Гутарка не толькі пра медыцыну, але і пра палітыку. Бо здароўе насельніцтва - гэта пытанне дзяржаўнай важнасці.
Жужанна Якаб, дырэктар Еўрапейскага рэгіянальнага бюро СААЗ:
"Вялікі дзякуй за магчымасць сустрэцца з вамі і за магчымасць правесці такую канферэнцыю высокага ўзроўню ў Мінску. На форум прыехалі вельмі прадстаўнічыя ўдзельнікі Вядома, краіны - члены САЗ хочуць пазнаёміцца з вопытам і вынікамі, дасягнутымі беларускай аховай здароўя. Гэтая сфера знаходзіцца ў вас на сапраўды высокім узроўні. Я хацела б асабіста падзякаваць вам за ваша лідарства, за вашы намаганні, накіраваныя на ўдасканаленне сістэмы аховы здароўя, якія прынеслі ўжо відавочны плён. Дазвольце таксама павіншаваць вас з абраннем на пасаду Прэзідэнта. У СААЗ палітычны складальнік мае вялікае значэнне. Мы ўпэўнены, што Беларусь зрабіла цалкам правільны палітычны выбар, інвеставаўшы ў сферу аховы здароўя. Гэтае вельмі правільнае рашэнне".
Еўрапейская канферэнцыя СААЗ праходзіць у штаб-кватэры Нацыянальнага алімпійскага камітэта Беларусі. Сімвалічна, што абмеркаванне пытанняў здароўя і здаровага ладу жыцця вядзецца ў зале з партрэтамі выбітных спартсменаў сучаснасці. У цэнтры ўвагі экспертаў - еўрапейская палітыка і стратэгія "Здароўе-2020". Спецыялісты на форуме аналізуюць аўтарытэтныя сусветныя даследаванні не толькі ў сферы медыцыны, але і ў галіне генетыкі, эканомікі і сацыяльных навук. Галоўная задача - зрабіць так, каб інвеставанне ў здароўе вялося на ўсіх этапах жыцця чалавека.
Для нагляднасці СААЗ спецыяльна да форуму выпусціла вось такі мультфільм, які проста тлумачыць складаныя катэгорыі.
У жыцці кожнага чалавека ёсць пара росту і пара завядання. Кожны перыяд - гэта магчымасць як палепшыць, так і страціць здароўе. Выбіраючы спадарожніка жыцця, становячыся бацькам, выходзячы на пенсію, кожны этап жыццёвага шляху - гэта яшчэ адна магчымасць умацавання здароўя.
Еўрапейская канцэпцыя "Здароўе 2020" дэкларуе, што ні адно чалавечае жыццё не праходзіць ізалявана. Мы ўсё аб'ядноўваемся ў сем'і, калектывы, нацыі - гэта як дрэвы, якія лепш растуць не паасобку, а разам. І каб лес чалавечы быў моцным і здаровым, патрэбныя сумесныя дзеянні розных урадаў у сферы медыцыны і аховы здароўя. Менавіта ў Мінску, менавіта сёння Еўропа выпісвае свой рэцэпт аздараўлення.
Мінская канферэнцыя выклікала вялізную цікавасць у медыцынскай супольнасці Еўропы. На форум прыехалі два з паловай дзясяткі міністраў аховы здароўя і іх намеснікаў, паўсотні кіраўнікоў розных арганізацый аховы здароўя. Сюды жа варта дадаць і звыш 40 высокапастаўленых супрацоўнікаў СААЗ і іншых агенцтваў ААН. Агульная колькасць удзельнікаў мерапрыемства - амаль 200 чалавек. Беларуская мадэль падтрымання здароўя нацыі - тэма, якая сёння прыцягнула найбольшую ўвагу. Пра развіццё айчыннай аховы здароўя распавёў Прэзідэнт Аляксандр Лукашэнка.
Наша краіна можа прапанаваць свой вопыт вырашэння такіх праблем, як мінімізацыя наступстваў чарнобыльскай катастрофы, забеспячэнне максімальнай даступнасці для людзей лячэбных устаноў. Гатовыя мы падзяліцца і гісторыяй стварэння магутных медыцынскіх цэнтраў сусветнага ўзроўню.
Здароўе грамадзян дорага абыходзіцца дзяржаве. Аднак Беларусь на гэта ніколі не будзе шкадаваць грошай. На ахову здароўя штогод выдзяляюцца значныя сродкі. Летась іх аб'ем, напрыклад, склаў амаль 6 % ад ВУП краіны. Толькі за мінулыя 5 гадоў у рэспубліцы ўведзена ў эксплуатацыю звыш 130 медыцынскіх аб'ектаў. Выдаткі на іх будаўніцтва і рэканструкцыю склалі больш за 600 мільёнаў долараў ЗША. Пры гэтым было завершана фарміраванне 17 рэспубліканскіх навукова-практычных цэнтраў, якія ахопліваюць усе аспекты здароўя і лячэння. І тут мы ў трэндзе. Бо менавіта еўрапейскія эксперты гавораць, што інвестыцыі ў здароўе - самыя правільныя. Напрыклад, кожны долар, укладзены ў рэпрадуктыўнае здароўе і здароўе маці і дзіцяці, у будучыні прыносіць каля 20 долараў у адказ.
Паменшыць колькасць захворванняў і скараціць паходы да ўрачоў дапамагае здаровы лад жыцця. Прапаганда спорту і барацьба са згубнымі звычкамі - гэта таксама ў прыярытэтах дзяржавы, якая клапоціцца аб самаадчуванні свайго народа.
Не пакідае без увагі дзяржава і пажылых людзей. Праз пяць гадоў доля пенсіянераў у Беларусі наблізіцца да 27%. Для грамадзян шаноўнага ўзросту ў краіне ствараюцца па магчымасці максімальна камфортныя ўмовы.
Ужо сёння айчынная ахова здароўя дасягнула па шматлікіх паказчыках узроўню высокаразвітых краін. У некаторых выпадках беларусам нават атрымліваецца абысці прызнаных лідараў.
Амерыканскае агенцтва "Блумберг" ацаніла эфектыўнасць сістэм аховы здароўя па трох крытэрыях. Гэта працягласць жыцця, доля выдаткаў на ахову здароўя ў нацыянальнай эканоміцы і абсалютная велічыня выдаткаў на душу насельніцтва. Беларусь, упершыню прадстаўленая ў гэтым рэйтынгу, заняла 42 месца. З былых савецкіх рэспублік Азербайджан - на 49-м месцы, Расія - на 51-м. Наша краіна апынулася нават на лепшай пазіцыі, чым Злучаныя Штаты Амерыкі, якія займаюць 44-ы радок у рэйтынгу.
А вось у спісе самых камфортных для мацярынства краін Беларусь паднялася на 26-ы радок. Пры складанні рэйтынгу ўлічваліся пяць фактараў: рызыка матчынай смяротнасці, гібель дзяцей ва ўзросце да 5 гадоў, узровень адукацыі, якую дзеці змогуць атрымаць, валавы нацыянальны даход і нават удзел жанчын у палітычным жыцці краіны.
Менавіта ахова здароўя маці і дзіцяці з'яўляецца ў нашай краіне прыярытэтам дзяржаўнай палітыкі.
У развіцці беларускай медыцыны актыўна выкарыстоўваюцца інавацыйныя распрацоўкі айчынных навукоўцаў. Навука і практыка злучаныя разам. Высокатэхналагічныя і складаныя аперацыі сталі стандартнымі працэдурамі для шматлікіх урачоў.
Актыўна развіваецца і айчынная фармацэўтыка. Да 2017 года ў Беларусі будзе рэалізавана 35 інвестыцыйных праектаў у гэтай сферы. У галіну ўжо прыцягнута больш як 40 мільёнаў долараў ЗША прамых замежных інвестыцый.
Асаблівая ўвага надаецца працы з кадрамі. Прычым, беларуская лячэбная школа захавала і прымножыла свой аўтарытэт. Замежнікі да нас едуць па веды. У нашых медуніверсітэтах летась вучыліся прадстаўнікі 72 краін свету.
Еўрапейскія дзяржавы зараз сутыкаюцца з падобнымі выклікамі і пагрозамі. Беларускі Прэзідэнт падкрэслівае, што разам спраўляцца з праблемамі заўсёды лягчэй.
Дыскусія ў Мінску лепшых медыцынскіх розумаў Еўропы працягнецца два дні. Эксперты плануюць знайсці адказы на такія пытанні, як захаванне балансу паміж тэрміновымі запытамі грамадства ў сферы медыцыны і магчымасцямі палітыкаў, а таксама ахова здароўя ў крызісных сітуацыях.
Менавіта беларускі вопыт і наша мадэль працы Міністэрства аховы здароўя можа быць запазычаная ўдзельнікамі форуму. Нездарма аўтарытэтная сусветная арганізацыя абрала менавіта Мінск пляцоўкай для абмеркавання пытанняў здароўя ўсёй Еўропы.
Дарэчы, удзельнікі форуму скарысталіся магчымасцю і асабіста наведаць лячэбныя ўстановы Беларусі. Да прыкладу, Жужана Якаб пабывала напярэдадні ў анкалагічным цэнтры ў Бараўлянах. Аб гэтым яна распавяла ў эксклюзіўным інтэрв'ю для нашай праграмы.
Ужо заўтра ў сталіцы нашай краіны будзе падпісаны новы міжнародны дакумент, які будуць цытаваць сусветныя СМІ.
Па выніках маштабнага медыцынскага форуму будзе падпісаная Мінская дэкларацыя. Гэта той самы рэцэпт, які паслужыць арыенцірам для развіцця аховы здароўя ўсіх краін Еўропы. Уся сутнасць стратэгіі, закладзенай у гэтым дакуменце, складаецца ў трох задачах: дзейнічаць як мага раней, дзейнічаць своечасова і дзейнічаць разам. Здароўе - гэта капітал чалавека, і чым лепш самаадчуванне кожнага грамадзяніна, тым ва ўсіх сэнсах багацейшая і ўся нацыя.
Рэцэпт аздараўлення краін Еўропы практычна выпісаны, далей справа за "фармацэўтамі" ў асобах урадаў некаторых дзяржаў. Тут менавіта той выпадак, калі не павінна быць памылак у чытанні і трактоўцы дакумента.
