Сітуацыя на фінансавым рынку, узмацненне адказнасці Нацбанка за яе стабільнасць і мерапрыемствы да 25-годдзя беларускага рубля. Гэтыя тэмы напярэдадні сталі ключавымі на сустрэчы Кіраўніка дзяржавы са старшынёй праўлення галоўнага фінансавага рэгулятара Паўлам Калаўрам.
За апошні год удалося дабіцца стабільнасці. І ў гэтым Прэзідэнт бачыць немалую заслугу Нацбанка. Цяперашняя грашова-крэдытная палітыка адпавядае пастаўленай мэце па інфляцыі - да канца года чакаецца абмежаванне лічбы ў межах 5 працэнтаў. Фарміраванне спрыяльнага асяроддзя для ўстойлівага развіцця эканомікі - ключавая задача Нацбанка. Адказнасць за фінансавую стабільнасць ускладзена на старшыню праўлення. Аднак, на думку кіраўніцтва, рэгулятара традыцыйных інструментаў грашова-крэдытнай палітыкі і банкаўскага нагляду можа апынуцца недастаткова. Таму прапаноўваецца ўзмацніць паўнамоцтвы Нацбанка і замацаваць яго адказнасць у гэтай сферы. Кіраўнік дзяржавы гэту ініцыятыву падтрымаў.
Нацыянальны банк сумесна з Саветам Міністраў мае намер распрацаваць стратэгію па павышэнні даверу да нацыянальнай валюты. У абарачэнні ў бягучым годзе з'явяцца абноўленыя купюры наміналам 5 і 10 рублёў, а таксама манеты: адна, дзве капейкі і два рублі. У першай палове гэтага года ў Беларусі можа з'явіцца і новы механізм працы з праблемнымі актывамі. Адпаведны праект указа знаходзіцца на абмеркаванні ва ўрадзе. А з 2021 года Нацыянальны банк Беларусі разлічвае на запуск у краіне абноўленай сістэмы валютнага рэгулявання. Яна прадугледжвае забарону выкарыстання замежнай валюты для разлікаў унутры краіны. Таксама адпаведны законапраект падрыхтаваны і накіраваны ва ўрад.
