Праваслаўныя вернікі ўсяго свету сёння адзначаюць Нараджэнне Хрыстовае, вітаючы адно аднаго словамі: "Хрыстос нарадзіўся!"; "Славім яго!". Гэты дзень спрадвеку прылічаны царквой да вялікіх двунадзясятых свят і з'яўляецца другім па значнасці пасля Вялікадня ў праваслаўнай канфесіі. Яго значэнне такое вялікае, што нават летазлічэнне вядзецца менавіта з моманту з'яўлення на небе першай зоркі, якая азначае нараджэнне Ісуса Хрыста. Гэты час малітвы і веры, надзеі і радасці. І нават нягледзячы на маразы - гэта вельмі цёплыя дні, калі блізкім дораць не толькі падарункі, але сваю любоў і дабрыню. Па традыцыі радасць гэтага светлага дня разам з вернікамі падзяліў Прэзідэнт. Аляксандр Лукашэнка з малодшым сынам Мікалаем прысутнічаў на набажэнстве ў Свята-Духавым кафедральным саборы. Разам з Мітрапалітам Паўлам яны запалілі калядную свечку ля цудатворнага абраза Мінскай Божай Маці - сімвал усеагульнай малітвы за Беларусь. У цёплай абстаноўцы Аляксандр Лукашэнка пагутарыў з вернікамі. З падрабязнасцямі - Ілона Красуцкая.
На вуліцы мінус 25, па адчуваннях куды халадней, але ў душы цёпла. Нават самая халодная святочная ноч сёлета не стала выпрабаваннем для вернікаў. Замест набажэнства па тэлевізары тысячы вернікаў выбралі дарогу да храма. Напярэдадні Раства галоўнае ўсяночнае дбанне адбылося ў сталічным Свята-Духавым кафедральным саборы. Адсюль шматлікія не спяшаліся разыходзіцца. Заставаліся нават на ранішнюю службу.
Па шматгадовай традыцыі радасць гэтага светлага дня (прыход у свет Збавіцеля), разам з вернікамі падзяляе Кіраўнік дзяржавы. З малодшым сынам Мікалаем Аляксандр Лукашэнка прыехаў у галоўны кафедральны сабор Мінска. Відавочна, перапады тэмпературы адбіваюцца і на тэлевізійнай тэхніцы. Але праз імгненне запацелая оптыка вяртаецца ў строй. І вось перад вачамі ўся прыгажосць храма.
У храме амаль хатняе становішча. Віншаванне гасцям ад навучэнцаў нядзельнай школы. І куды ж без салодкіх падарункаў у адказ. Шматлікія прыйшлі сем'ямі, з дзецьмі. Захоўвалі пост усе 40 дзён. Кожны ставіць свечку. За здароўе родных і ў памяць пра тых, каго ўжо няма побач. Сімвал усеагульнай малітвы за Беларусь, мір і спакой на нашай зямлі - калядная свечка ля цудатворнага абраза Мінскай Божай Маці.
Раство - час пакоры і прабачэння. Вялікая радасць сёння аб'ядноўвае ўсіх хрысціян. Заканамерна, што ў гэты асаблівы дзень больш хочацца гаварыць пра добрае: дабрабыт, міласэрнасць, любоў. А яшчэ гэта час надзей, надзей на лепшае. У цёплай абстаноўцы Аляксандр Лукашэнка пагутарыў з вернікамі. Шчыра Кіраўнік дзяржавы гаварыў пра галоўнае - міжканфесійны мір, узаемадзеянне царквы і дзяржавы як роўных партнёраў, знешнюю палітыку і будучыню краіны.
Складана ўявіць, але ў гэтыя светлыя дні ў розных пунктах планеты ідуць кровапралітныя канфлікты, гучаць выстралы. Камусьці не ўдалося сустрэць Новы год з сям’ёй, а дзецям не дасталіся падарункі. 2017 ужо пачаўся з тэракта ў Стамбуле, сёння стральба ў Фларыдзе. Падзеі, пра якія часцей даведваешся толькі па тэлевізары або ад знаёмых, здаюцца такімі далёкімі. І ў той жа час нагадваюць аб сапраўднай каштоўнасці міру.
Мінулы год быў няпростым. Вялікую палітыку і эканоміку штарміла ва ўсіх сэнсах. Але не час аглядвацца на кагосьці. Так, бяспека, стратэгія развіцця краіны застаюцца нязменным прыярытэтам дзяржавы. На гэтым робіць асаблівы акцэнт Прэзідэнт. А вось дабрабыт і эканамічнае развіццё залежаць ад унёска кожнага.
У віншаванні Кіраўніка дзяржавы гучаць заклікі быць больш уважлівымі і клапатлівымі да навакольных, пажаданні здароўя і спраўджвання самых запаветных надзей. Асабліва ў гэта свята шмат добрых слоў, мір, спакой і дабрабыт не маюць канфесійнай прыналежнасці.
З нагоды свята Аляксандр Лукашэнка і Мітрапаліт Павел абмяняліся падарункамі. У дарунак Кіраўніку дзяржавы Мітрапаліт паднёс выяву Іверскай іконы Божай Маці і ікону Анёла-захавальніка, напісаныя і асвячоныя на святой гары Афон. Аляксандр Лукашэнка перадаў Беларускай праваслаўнай царкве ікону Божай Маці "Замілаванне", выкананую ў старажытнай тэхніцы. Малюнак - выява Багародзіцы - выкладзены сусальным золатам.
Строгі 40-дзённы Піліпаў пост у мінулым. У вернікаў пачынаецца самая цудоўная пара – калядныя святы. Час міласэрнасці, калі прынята хадзіць у госці і дарыць падарункі.
Раство і як пачатак новага жыцця. Свята, якое нясе з сабою святло вялікай веры, зварот да вечных каштоўнасцяў. Славіць нованароджанага Хрыста беларусы будуць яшчэ 12 дзён да свята Вадохрышча. Але ў пропаведзях духавенства гучыць асаблівая просьба - не абмяжоўваць сябе толькі гэтым адрэзкам часу, а захоўваць любоў і глыбокую павагу ў душы кожны дзень.
