Беларуска-славацкае супрацоўніцтва, развіццё міжпарламенцкага дыялогу і падрыхтоўка да летняй сесіі Парламенцкай асамблеі АБСЕ ў Мінску. Гэтыя і іншыя пытанні сёння абмеркавалі спікер Палаты прадстаўнікоў Уладзімір Андрэйчанка і пасол Славакіі ў Беларусі Ёзеф Мігаш. Вялікая частка перамоў была прысвечана і ўзаемадзеянню на пляцоўках Парламенцкай асамблеі АБСЕ і Савета Еўропы. Ужо ў ліпені беларуская сталіца прыме 26-ю штогадовую сесію Парламенцкай асамблеі. Яна прысвечана ўмацаванню ўзаемнага даверу і супрацоўніцтва ў імя міру і росквіту ў рэгіёне. У Мінск прыедуць каля 700 гасцей. Распараджэннем Кіраўніка дзяржавы створаны рэспубліканскі аргкамітэт па падрыхтоўцы маштабнага мерапрыемства.
Нагадаем, у лістападзе мінулага года Мінск з афіцыйным візітам наведаў прэм'ер-міністр Славакіі Роберт Фіца. Сустрэча на вышэйшым узроўні адбылася ў Палацы Незалежнасці. Значная частка перамоў была прысвечана прасоўванню дыялогу па лініі Беларусь - ЕС, паколькі ў другой палове 2016 Славакія старшынствавала ў Еўрасаюзе. Прэзідэнт Аляксандр Лукашэнка выказаў падзяку Славакіі за нармалізацыю адносін Мінска і Бруселя. Акрамя таго, палітыкі абмеркавалі ўсе пытанні ўзаемнага супрацоўніцтва.
Славакія - важны для нас партнёр у Цэнтральнай Еўропе. Цікавасць да цеснага ўзаемадзеяння з нашай краінай ляжыць у плоскасці як мінімум 5 эканамічных кірункаў - гэта фармацэўтыка, атамная энергетыка, вытворчасць шын, дрэваапрацоўка і газавая сфера. Дыялог аб канкрэтных праграмах і праектах, якія цікавыя абедзвюм краінам, прадоўжыцца ў найбліжэйшы час. У красавіку плануецца візіт прэм'ер-міністра Беларусі Андрэя Кабякова ў Славакію.
Уладзімір Андрэйчанка, Старшыня Палаты прадстаўнікоў Нацыянальнага сходу Беларусі: "Нам прыемна, што ў нас такія цёплыя сяброўскія адносіны з вашай краінай склаліся. Славакія - надзейны партнёр Беларусі ў Еўропе. І прыемна, што апошні час у нас шмат ужо зроблена і шмат робіцца для развіцця ўсебаковых адносін паміж нашымі краінамі .І вялікая заслуга ў гэтым і ваша".
Ёзеф Мігаш, Надзвычайны і Паўнамоцны Пасол Славакіі ў Беларусі: "Пасол любой дзяржавы, тым больш дружалюбнай, калі пачаўся такі новы віток актывізацыі нашых адносін, узаемнай падтрымкі, думае, як зрабіць усё больш эфектыўна, лепш, каб нашы адносіны былі выніковымі. Лічу, што зносіны з заканадаўчым органам, парламентам краіны вашай - гэта ключавая частка працы пасла".
Зараз парламенцкая дэлегацыя нашай краіны на чале з віцэ-спікерам Баляславам Пірштуком знаходзіцца ў Вене. На зімовым пасяджэнні Парламенцкай асамблеі АБСЕ Беларусь прэзентуе свой патэнцыял у якасці гаспадыні 26-й штогадовай сесіі.
